ஐநா சபைக்கு செல்ல ஐரோப்பிய வான்வெளியை தவிர்த்து பறந்த இஸ்ரேல் பிரதமரின் ஜெட்; இதான் காரணமா?
செய்தி முன்னோட்டம்
இஸ்ரேலிய பிரதமர் பெஞ்சமின் நெதன்யாகு கைது செய்யப்படுவதைத் தவிர்ப்பதற்காக நியூயார்க்கில் உள்ள ஐ.நா சபையின் பொதுக்கூட்டத்தில் கலந்து கொள்ள நீண்ட நெடிய பாதையை தேர்வு செய்து பயணம் செய்தார். சர்வதேச குற்றவியல் நீதிமன்றம் (ICC) நவம்பர் 2024 இல் போர்க்குற்றங்களுக்காக பெஞ்சமின் நெதன்யாகுவுக்கு எதிராக கைது வாரண்ட் பிறப்பித்தது. நெதன்யாகுவின் விமானத்தின் பாதை மத்தியதரைக் கடல் வழியாக கண்காணிக்கப்பட்டு, பிரான்ஸ், ஸ்பெயின், போர்ச்சுகல், அயர்லாந்து மற்றும் ஐக்கிய இராச்சியம் போன்ற நாடுகளைத் தவிர்த்து பறந்தது. இந்த நாடுகள் ICC உத்தரவிற்கு உடன்படுவதாக கையொப்பமிட்டவை. அதனால் நெதன்யாகு அவர்களின் எல்லைக்குள் நுழைந்தால் கைது செய்ய வேண்டியிருக்கும்.
விவரங்கள்
ICC கையெழுத்திட்ட பல நாடுகள் வழியாக பயணத்தை தவிர்த்த விமானம்
இந்த விமான பயணத்திற்காக இஸ்ரேல் தனது வான்வெளியைப் பயன்படுத்த பிரான்ஸ் அனுமதித்திருந்தாலும், பயணத் திட்டங்கள் வழியில் மாறியிருக்கலாம் என்று தகவல்கள் தெரிவிக்கின்றன. இஸ்ரேலுக்கும், பிரான்சுக்கும் இடையிலான உறவுகள் சமீபத்தில் மோசமடைந்துள்ளன. காசாவில் வன்முறையை நிறுத்த இஸ்ரேல் மீது அழுத்தம் கொடுக்க பிரான்ஸ் சர்வதேச இராஜதந்திர முயற்சியை முன்னெடுத்துள்ளது. இதில் இந்த வாரம் பாலஸ்தீனத்தை ஒரு நாடாக அங்கீகரிப்பதும் அடங்கும். நெதன்யாகு அங்கீகாரத்தை கடுமையாக எதிர்த்தார். விமான பாதை மாற்றத்திற்கான அதிகாரப்பூர்வ காரணத்தை இஸ்ரேல் அரசாங்கம் வழங்கவில்லை.
வரவிருக்கும் நிகழ்வுகள்
டிரம்பை சந்திக்கும் நெதன்யாகு, ஐ.நா சபையில் உரையாற்றுவார்
வெள்ளிக்கிழமை ஐ.நா. பொதுச் சபையில் நெதன்யாகு உரையாற்ற உள்ளார். அங்கு பாலஸ்தீன அரசை ஆதரிக்கும் தலைவர்களைக் கண்டிக்கத் திட்டமிட்டுள்ளார். அடுத்த வாரம் அமெரிக்க அதிபர் டொனால்ட் டிரம்பையும் சந்திப்பார். நெதன்யாகுவும் டிரம்பும் ICC-யின் அதிகாரத்தை நிராகரிக்கின்றனர். இஸ்ரேலிய தலைவர் பாலஸ்தீனத்தை ஒரு நாடாக அங்கீகரிப்பதற்கு எதிராகக் குரல் கொடுத்து வருகிறார். சமீபத்தில் பல மேற்கத்திய நாடுகள் இந்த நடவடிக்கையை எடுத்துள்ளன. நெதன்யாகுவின் அலுவலகம் இந்த அங்கீகாரத்தை "வெட்கக்கேடான சரணாகதி" என்று நிராகரித்துள்ளது. இந்த அங்கீகாரம் எந்த வகையிலும் இஸ்ரேலை "கட்டாயப்படுத்தாது" என்று அலுவலகம் தெரிவித்துள்ளது.
கைது வாரண்ட்
போர் குற்றங்களுக்காக ICC கைது வாரண்ட்
ICC கடந்த 2024 ஆம் ஆண்டு காசாவில் நடந்த போர்க்குற்றங்கள் மற்றும் மனிதகுலத்திற்கு எதிரான குற்றங்களை செய்ததாக குற்றம் சாட்டி, நெதன்யாகு மற்றும் முன்னாள் பாதுகாப்பு அமைச்சர் யோவ் கல்லண்ட் மற்றும் தற்போது இறந்துவிட்ட ஹமாஸ் தளபதி முகமது டெய்ஃப் ஆகியோருக்கு கைது வாரண்ட்களை பிறப்பித்தது. ஹமாஸுடனான இஸ்ரேலின் போரின் போது செய்யப்பட்ட சந்தேகத்திற்குரிய போர்க்குற்றங்கள் மற்றும் மனிதகுலத்திற்கு எதிரான குற்றங்களுக்கு மூன்று நபர்களும் "குற்றவியல் பொறுப்பு" கொண்டவர்கள் என்று நம்புவதற்கு "நியாயமான காரணங்கள்" இருப்பதாக ஐ.சி.சி நீதிபதிகள் தீர்மானித்தனர். இஸ்ரேலும், ஹமாஸும் குற்றச்சாட்டுகளை மறுக்கின்றன.