இலங்கை முன்னாள் அதிபர் மகிந்த ராஜபக்சே தீவிர சிகிச்சைப் பிரிவில் அனுமதி
செய்தி முன்னோட்டம்
இலங்கையின் முன்னாள் அதிபரும் அந்நாட்டு அரசியலின் மூத்த தலைவருமான மகிந்த ராஜபக்சே (80), திடீர் உடல்நலக் குறைவு காரணமாக அவசர மருத்துவ சிகிச்சைக்காக கொழும்பில் உள்ள தனியார் மருத்துவமனை ஒன்றில் அனுமதிக்கப்பட்டுள்ளார். அங்கு அவருக்குத் தீவிர சிகிச்சைப் பிரிவில் (ICU) தீவிர சிகிச்சை அளிக்கப்பட்டு வருவதாகவும், சிறப்பு மருத்துவக் குழுவினர் அவரது உடல்நிலையைத் தொடர்ந்து கண்காணித்து வருவதாகவும் அவரது கட்சியான 'ஸ்ரீலங்கா பொதுஜன பெரமுன' அதிகாரப்பூர்வமாகத் தெரிவித்துள்ளது. எனினும், அவருக்கு ஏற்பட்டுள்ள பாதிப்பு என்ன என்பது குறித்த தகவல்கள் வெளியிடப்படாததால் பரபரப்பு நிலவுகிறது.
உடல்நிலை
மருத்துவக் கண்காணிப்பில் தீவிர சிகிச்சை
80 வயதான மகிந்த ராஜபக்சேவுக்கு நேற்று காலை திடீரென மூச்சுத்திணறல் உள்ளிட்ட உடல் உபாதைகள் ஏற்பட்டதைத் தொடர்ந்து, உடனடியாக அவர் மருத்துவமனைக்கு அழைத்துச் செல்லப்பட்டதாகக் கூறப்படுகிறது.
அவருக்கு ஏற்பட்டுள்ள நோய் பாதிப்பு தன்மை மற்றும் அளிக்கப்படும் மருத்துவ சிகிச்சைகள் குறித்த விரிவான மருத்துவக் குறிப்புகள் எதுவும் இதுவரை வெளிப்படையாக அறிவிக்கப்படவில்லை.
தற்போது தீவிர சிகிச்சைப் பிரிவில் அனுமதிக்கப்பட்டுள்ள அவரது உடல்நிலை சீராக உள்ளதா அல்லது கவலைக்கிடமாக உள்ளதா என்பது குறித்து மருத்துவமனை நிர்வாகம் எந்தவொரு அதிகாரப்பூர்வ அறிக்கையையும் இதுவரை வெளியிடவில்லை.
அரசியல் செல்வாக்கு சரிவு
அரசியல் நெருக்கடிகளுக்கு மத்தியில் உடல்நலக் குறைவு
இலங்கையில் அதிபர் மற்றும் பிரதமராகப் பதவி வகித்து அந்நாட்டு அரசியலை முழுமையாகக் கட்டுப்படுத்தியவர் மகிந்த ராஜபக்சே.
2009-ல் விடுதலைப் புலிகளுக்கு எதிரான போரை முன்னின்று நடத்திய இவர், 2022 பொருளாதார வீழ்ச்சிக்குப் பிறகு குடும்பத்துடன் பெரும் அரசியல் சரிவைச் சந்தித்தார்.
தற்போதைய அதிபர் அநுர குமார திசாநாயக தலைமையிலான அரசு, ராஜபக்சே ஆட்சிக் கால முறைகேடுகள் குறித்து தீவிர விசாரணைகளைத் தொடங்கியுள்ளது. அவரது மனைவி, மகன் மீது ஏற்கனவே கைது நடவடிக்கைகள் பாய்ந்துள்ளன.
இத்தகைய கடும் சட்ட நெருக்கடிகளுக்கு மத்தியில், மகிந்த ராஜபக்சே உடல்நலக்குறைவால் தீவிர சிகிச்சைப் பிரிவில் அனுமதிக்கப்பட்டுள்ளது அந்நாட்டு அரசியலில் பெரும் பரபரப்பை ஏற்படுத்தியுள்ளது.