₹100 இருந்தால் போதும்; மைதானத்திலேயே டி20 உலகக்கோப்பையை பார்க்கலாம்; டிக்கெட் விற்பனையை தொடங்கியது ஐசிசி

எழுதியவர் Sekar Chinnappan

Dec 11, 2025

06:13 pm

செய்தி முன்னோட்டம்

சர்வதேச கிரிக்கெட் கவுன்சில் (ஐசிசி), 2026 ஆம் ஆண்டுக்கான ஆடவர் டி20 உலகக்கோப்பைக்கான டிக்கெட் விற்பனையை இன்று (டிசம்பர் 11) திறந்துள்ளது. இந்த உலகளாவிய கிரிக்கெட் நிகழ்வு பிப்ரவரி 7 முதல் மார்ச் 8, 2026 வரை இந்தியா மற்றும் இலங்கையில் உள்ள எட்டு மைதானங்களில் (சென்னை எம்ஏ.சிதம்பரம் மைதானம் உட்பட) நடைபெற உள்ளது. மொத்தம் 20 அணிகள் பங்கேற்கும் 55 போட்டிகளை உள்ளடக்கிய இந்தத் தொடரின் இறுதிப் போட்டி மார்ச் 8 அன்று நடைபெறும். ஆரம்ப நாள் ஆட்டத்தில், நடப்புச் சாம்பியனான இந்தியா, மும்பையில் அமெரிக்காவை எதிர்கொள்ள உள்ளது. அதிக கிரிக்கெட் ரசிகர்களை மைதானத்திற்குள் ஈர்க்கும் நோக்கில், ஐசிசி முதல் கட்ட டிக்கெட்டுகளை இதுவரை இல்லாத மிகக் குறைந்த விலையில் நிர்ணயித்துள்ளது.

இந்தியா

இந்தியாவில் டிக்கெட் விலை

இந்தியாவில் டிக்கெட்டுகளின் ஆரம்ப விலை வெறும் ₹100 ஆகவும், இலங்கையில் அந்நாட்டு ரூபாய் மதிப்பில் 1000 ஆகவும் நிர்ணயிக்கப்பட்டுள்ளது. இந்த முதல் கட்ட விற்பனையில் 20 லட்சத்திற்கும் அதிகமான டிக்கெட்டுகள் கிடைக்கின்றன. இந்த மலிவு விலை உத்தி, கிரிக்கெட் ரசிகர்களுக்குப் பெரிய கொண்டாட்டமாக இருக்கும் என்று ஐசிசி சிஇஓ சஞ்சோக் குப்தா தெரிவித்தார். இந்தத் தொடருக்கான டிக்கெட்டுகளை ரசிகர்கள் இன்று மாலை 6:45 மணி முதல் https://tickets.cricketworldcup.com என்ற இணையதளம் மூலம் வாங்கலாம். இந்தியாவின் முக்கிய நகரங்களான சென்னை, மும்பை, அகமதாபாத், டெல்லி மற்றும் கொல்கத்தா ஆகிய மைதானங்களில் நடைபெறும் போட்டிகளுக்கு இந்த விலை பொருந்தும். எனவே, கிரிக்கெட் ரசிகர்கள் விரைந்து தங்கள் டிக்கெட்டுகளைப் பதிவு செய்து, போட்டிகளை நேரில் காணலாம்.