தென்னைப்பிரிக்க டெஸ்ட் தொடரிலிருந்து விலகிய ருத்துராஜ் கெயிக்வாட், இந்தியாவிற்கு திரும்பிய விராட் கோலி!
மூன்று டி20 போட்டிகள், மூன்று ஒருநாள் போட்டிகள் மற்றும் இரண்டு டெஸ்ட் போட்டிகளில் விளையாட தென்னாப்பிரிக்காவில் சுற்றுப்பயணம் மேற்கொண்டிருக்கிறது இந்திய கிரிக்கெட் அணி. டி20 தொடரில் இந்தியா மற்றும் தென்னாப்பிரிக்க அணிகள் தலா ஒரு போட்டியில் வென்றிருக்க, ஒரு போட்டி மழையால் பாதிக்கப்பட்டதன் காரணமாக தொடர் டிராவில் முடிவடைந்தது. மேற்கூறிய இரு அணிகளுக்கும் இடையிலான ஒருநாள் தொடர் நேற்று முடிவடைந்தது. இந்த ஒரு ஒரு தொடரில் இரண்டு போட்டிகளில் வெற்றி பெற்று தொடரையும் வென்று இந்திய அணி. இவற்றைத் தொடர்ந்து இரு அணிகளுக்கும் இடையிலான டெஸ்ட் தொடரானது வரும் டிசம்பர் 26ம் தேதி தொடங்கவிருக்கிறது.
அணியிலிருந்து விலகிய வீரர்:
தென்னாப்பிரிக்காவிற்கு எதிரான இந்திய டெஸ்ட் அணியில் இளம் வீரரான ருத்துராஜ் கெயிக்வாட்டின் பெயரும் இடம்பெற்றிருந்தது. இந்நிலையில், கைவிரலில் ஏற்பட்ட காயம் காரணமாக தென்னாப்பிரிக்காவிற்கு எதிரான இந்திய டெஸ்ட் அணியில் இருந்து ருத்துராஜ் விலகுவதாக தற்போது அறிவிக்கப்பட்டிருக்கிறது. மேலும், இந்தியாவின் ஸ்டார் வீரரான விராட் கோலி முதற் போட்டிக்கு முன்னதாக நடைபெறவிருக்கும் பயிற்சிப் போட்டிகளில் பங்கேற்காமல் இந்தியாவிற்கு திரும்பியிருப்பதாகவும் தகவல் வெளியாகியிருக்கிறது. குடும்பக் காரணங்களால் அவர் இந்தியா திரும்பியிருப்பதாகக் கூறப்படும் நிலையில், முதல் டெஸ்ட் போட்டி தொடங்குவதற்கு முன்பாகவே அவர் மீண்டும் அணியில் இணைவார் எனவும் தகவல் வெளியாகியிருக்கிறது.
