எம்பாப்பே அபார ஆட்டம்: பார்சிலோனாவை அதன் சொந்த மண்ணில் வீழ்த்திய ரியல் மாட்ரிட் அணி
செய்தி முன்னோட்டம்
ஸ்பானிஷ் லா லிகா கால்பந்து தொடரின் பரபரப்பான எல்கிளாசிகோ ஆட்டத்தில், நட்சத்திர வீரர் கிலியன் எம்பாப்பே அடித்த கடைசி நேர அதிரடி கோலால் பார்சிலோனா அணியை 2-1 என்ற கோல் கணக்கில் வீழ்த்தி ரியல் மாட்ரிட் அபார வெற்றி பெற்றது. பார்சிலோனாவின் சொந்த மைதானமான ஸ்பாட்டிஃபை கேம்ப் நவுவில் நடைபெற்ற இப்போட்டியின் 41-வது நிமிடத்தில் ரியல் மாட்ரிட் அணி முதல் கோலை அடித்தது. யான் டியோமாண்டே அனுப்பிய கிராஸை பார்சிலோனா வீரர் ஜெரார்ட் மார்ட்டின் தடுக்க முயன்றபோது, பந்து எம்பாப்பே மீது பட்டு எதிர்பாராதவிதமாக வலைக்குள் புகுந்ததால், முதல் பாதியில் ரியல் மாட்ரிட் 1-0 என முன்னிலை வகித்தது.
சமநிலை
வெற்றி கோல் அடித்த எம்பாப்பே
இரண்டாவது பாதியில் சொந்த ரசிகர்களின் ஆதரவுடன் ஆக்ரோஷமாக விளையாடிய பார்சிலோனா அணி 61-வது நிமிடத்தில் பதிலடி கொடுத்தது.
சக வீரர் பெட்ரி கொடுத்த நேர்த்தியான பாஸைப் பயன்படுத்திய ரபினியா பந்தை வலைக்குள் தள்ளி ஆட்டத்தை 1-1 எனச் சமநிலைக்குக் கொண்டு வந்தார்.
இதனால் ஆட்டம் சமனில் முடியும் என்று எதிர்பார்க்கப்பட்ட தருணத்தில், 87-வது நிமிடத்தில் ரியல் மாட்ரிட் அணியின் வெற்றி கோலை அடித்து எம்பாப்பே பார்சிலோனா ரசிகர்களுக்குப் பெரும் அதிர்ச்சி அளித்தார்.
இதன் மூலம் ரியல் மாட்ரிட் 2-1 என மீண்டும் முன்னிலையைப் பெற்றது.
வெற்றி
சொந்த மண்ணில் வீழ்ந்த பார்சிலோனா
ஆட்டத்தின் எஞ்சிய நிமிடங்களிலும், கூடுதல் நேரத்திலும் பார்சிலோனா வீரர்கள் கோல் அடிக்க மேற்கொண்ட தீவிர முயற்சிகள் பலனளிக்கவில்லை.
இதனால் இறுதி வரை முன்னிலையைத் தக்கவைத்த ரியல் மாட்ரிட் அணி 2-1 என்ற கணக்கில் வெற்றியை உறுதி செய்தது.
நடப்பு சீசனில் ரியல் மாட்ரிட் அணிக்காக இதுவரை 14 கோல்களைப் பதிவு செய்துள்ள கிலியன் எம்பாப்பே, பார்சிலோனாவின் சொந்த மண்ணிலேயே இரண்டு கோல்களை அடித்துத் தனது அபார ஃபார்மை மீண்டும் நிரூபித்துள்ளார்.