ஐபிஎல் 2026: 350 சிக்ஸர்கள் விளாசி ஃபில் சால்ட் சாதனை; மும்பையை வீழ்த்திய ஆர்சிபி வீரருக்கு ஆட்டநாயகன் விருது

எழுதியவர் Sekar Chinnappan

Apr 13, 2026

06:17 am

செய்தி முன்னோட்டம்

ஐபிஎல் 2026 தொடரின் 20வது லீக் போட்டியில் மும்பை இந்தியன்ஸ் (எம்ஐ) அணிக்கு எதிராக ராயல் சேலஞ்சர்ஸ் பெங்களூரு (ஆர்சிபி) வீரர் ஃபில் சால்ட் ருத்ரதாண்டவம் ஆடினார். வான்கடே மைதானத்தில் நடைபெற்ற இந்தப் போட்டியில், தனது முதல் சிக்ஸரை அடித்த போதே டி20 கிரிக்கெட்டில் 350 சிக்ஸர்கள் என்ற மகத்தான சாதனையை அவர் எட்டினார். இந்தப் போட்டியில் 78 ரன்கள் குவித்து அணியின் வெற்றிக்கு முக்கியக் காரணமாக இருந்த ஃபில் சால்ட், தகுதியான முறையில் ஆட்டநாயகன் விருதினையும் தட்டிச் சென்றார்.

36 பந்துகளில் 78 ரன்கள்

மும்பை பந்துவீச்சைச் சிதறடித்த சால்ட்

தொடக்க வீரராகக் களமிறங்கிய சால்ட், ஆரம்பம் முதலே அதிரடியைக் கையாண்டார். வெறும் 36 பந்துகளில் 6 சிக்ஸர்கள் மற்றும் 6 பவுண்டரிகளுடன் 78 ரன்கள் குவித்தார். இவரது ஸ்ட்ரைக் ரேட் 216.67 ஆக இருந்தது. குறிப்பாக, விராட் கோலியுடன் இணைந்து முதல் விக்கெட்டுக்கு 120 ரன்கள் சேர்த்த சால்ட், பவர் பிளே ஓவர்களிலேயே அணியின் ஸ்கோரை 71 ரன்களுக்குக் கொண்டு சென்றார். ஷர்துல் தாகூர் பந்துவீச்சில் ஆட்டமிழக்கும் வரை மும்பை பந்துவீச்சாளர்களுக்குச் சிம்ம சொப்பனமாகத் திகழ்ந்தார்.

டி20 புள்ளிவிவரங்கள்

355 சிக்ஸர்களுடன் எலைட் பட்டியலில் சால்ட்

உலகெங்கிலும் உள்ள டி20 லீக் தொடர்களில் விளையாடி வரும் ஃபில் சால்ட், தற்போது 336 போட்டிகளில் (326 இன்னிங்ஸ்) விளையாடி 355 சிக்ஸர்களை விளாசியுள்ளார். மேலும், 878 பவுண்டரிகளுடன் மொத்தம் 8,444 ரன்களைக் குவித்துள்ளார். இவரது சராசரி 27.96 மற்றும் ஸ்ட்ரைக் ரேட் 155.19 ஆகும். இன்றைய போட்டியில் அடித்த அரைசதம், டி20 கிரிக்கெட்டில் அவர் அடிக்கும் 54-வது அரைசதமாகும். இது தவிர 4 சதங்களையும் அவர் தனது கணக்கில் வைத்துள்ளார்.

பிலிப் சால்ட்

இங்கிலாந்து வீரர்களின் சாதனையும் சால்ட்டின் இடமும்

சர்வதேச டி20 போட்டிகளைப் பொறுத்தவரை, இங்கிலாந்து அணிக்காக அதிக சிக்ஸர்கள் அடித்த வீரர்கள் பட்டியலில் சால்ட் (83 சிக்ஸர்கள்) மூன்றாவது இடத்தில் உள்ளார். இவருக்கு முன்னதாக ஜாஸ் பட்லர் (175) மற்றும் இயான் மோர்கன் (120) ஆகியோர் மட்டுமே உள்ளனர். 80 சிக்ஸர்களுக்கு மேல் அடித்த மூன்று இங்கிலாந்து வீரர்களில் ஒருவராக சால்ட் திகழ்வது அவரது அதிரடித் திறமைக்குச் சான்றாகும்.

ஐபிஎல்

ஐபிஎல் தொடரில் சால்ட்டின் ஆதிக்கம்

டெல்லி கேப்பிடல்ஸ் மற்றும் கொல்கத்தா நைட் ரைடர்ஸ் அணிகளுக்காக விளையாடிய அனுபவம் கொண்ட சால்ட், தற்போது ஆர்சிபி அணிக்காக விளையாடி வருகிறார். ஐபிஎல் தொடரில் இதுவரை 38 போட்டிகளில் விளையாடியுள்ள அவர், 1,188 ரன்களைக் குவித்துள்ளார். இதில் 11 அரைசதங்கள் அடங்கும். ஐபிஎல் தொடரில் மட்டும் இதுவரை 64 சிக்ஸர்களை விளாசியுள்ள சால்ட், 176 என்ற அதிரடியான ஸ்ட்ரைக் ரேட்டைக் கொண்டுள்ளார். நேற்றைய ஆட்டநாயகன் விருது அவரது சிறப்பான ஃபார்மை மீண்டும் உறுதிப்படுத்தியுள்ளது.