இந்தியாவுக்கு எதிராக டி20 தொடருக்கான ஆஸ்திரேலிய அணி அறிவிப்பு
நவம்பரில் ஒருநாள் உலகக்கோப்பை இறுதிப்போட்டி முடிந்த பிறகு தொடங்கும் இந்தியாவுக்கு எதிரான ஐந்து போட்டிகள் கொண்ட டி20 கிரிக்கெட் தொடருக்கான ஆஸ்திரேலிய கிரிக்கெட் அணி அறிவிக்கப்பட்டுள்ளது. 15 வீரர்கள் கொண்ட இந்த அணியை மேத்யூ வேட் கேப்டனாக வழிநடத்த உள்ளார். முன்னதாக, தென்னாப்பிரிக்காவில் நடந்த டி20 தொடரில் அணியின் கேப்டனாக செயல்பட்ட மிட்செல் மார்ஷுக்கு இதில் ஓய்வு அளிக்கப்பட்டுள்ளது. மார்ஷ் தவிர, ஆல் ரவுண்டர் கேமரூன் கிரீன் மற்றும் பாட் கம்மின்ஸ், மிட்செல் ஸ்டார்க் மற்றும் ஜோஷ் ஹேசில்வுட் ஆகிய வேகப்பந்து வீச்சாளர்களுக்கும் இதில் ஓய்வளிக்கப்பட்டுள்ளது. அதே நேரத்தில் தென்னாப்பிரிக்க தொடரில் இடம் பெறாத மூத்த வீரர்களான ஸ்டீவ் ஸ்மித் மற்றும் டேவிட் வார்னர் ஆகியோர் மீண்டும் ஆஸ்திரேலியாவின் டி20 அணிக்குத் திரும்பியுள்ளனர்.
ஆஸ்திரேலிய அணி வீரர்களின் பட்டியல்
கையில் ஏற்பட்ட காயத்தில் இருந்து குணமடைந்துள்ள டிராவிஸ் ஹெட்டும் இந்திய கிரிக்கெட் அணிக்கு எதிரான ஆஸ்திரேலியாவின் டி20 அணியில் இடம்பிடித்துள்ளார். வீரர்களின் பட்டியல் : மேத்யூ வேட், ஜேசன் பெஹ்ரன்டோர்ஃப், சீன் அபோட், டிம் டேவிட், நாதன் எல்லிஸ், டிராவிஸ் ஹெட், ஜோஷ் இங்கிலிஸ், ஸ்பென்சர் ஜான்சன், கிளென் மேக்ஸ்வெல், தன்வீர் சங்கா, மாட் ஷார்ட், ஸ்டீவ் ஸ்மித், மார்கஸ் ஸ்டோனிஸ், டேவிட் வார்னர், ஆடம் ஜாம்பா. ஆஸ்திரேலிய தேர்வுக்குழு தலைவர் ஜார்ஜ் பெய்லி இது குறித்து கூறுகையில், தற்போதைய ஒருநாள் உலகக்கோப்பை முடிந்த பிறகு, 2024 டி20 உலேகக்கோப்பைக்காக களம் மாறும் என்பதால் அதை மனதில் வைத்து வீரர்கள் தேர்வு செய்யப்பட்டுள்ளனர் என்றார்.
