ஐபிஎல் 2026 ஏலம்: முன்னாள் ஆர்சிபி வீரரை எடுக்க சிஎஸ்கேவுக்கு ஸ்ரீகாந்த் வலியுறுத்தல்; யார் அவர்?
செய்தி முன்னோட்டம்
முன்னாள் இந்திய கேப்டன் கிருஷ்ணமாச்சாரி ஸ்ரீகாந்த், ஐபிஎல் 2026 மினி ஏலத்தில் சென்னை சூப்பர் கிங்ஸ் (சிஎஸ்கே) அணி ஒரு எதிர்பாராத வீரரை எடுக்க வலியுறுத்தியுள்ளார். ராயல் சேலஞ்சர்ஸ் பெங்களூர் (ஆர்சிபி) அணிக்காக விளையாடிய நியூசிலாந்து ஆல்ரவுண்டர் மைக்கேல் பிரேஸ்வெல்லை ஏலத்தில் எடுக்கச் சிஎஸ்கே நிர்வாகத்தைக் அவர் கோரியுள்ளார். ஐந்து முறை சாம்பியனான சிஎஸ்கே, செவ்வாய்க்கிழமை (டிசம்பர் 16) அபுதாபியில் நடைபெறும் ஏலத்திற்கு, கொல்கத்தா நைட் ரைடர்ஸுக்குப் பிறகு இரண்டாவது பெரிய தொகையான ₹43.40 கோடி பணத்துடன் நுழைகிறது.
ஆல்ரவுண்டர்
குறைத்து மதிப்பிடப்படும் ஆல்ரவுண்டர்
ஸ்ரீகாந்த் தனது யூடியூப் சேனலில் பேசுகையில், "நான் சிஎஸ்கே நிர்வாகத்தில் இருந்தால், மைக்கேல் பிரேஸ்வெல் போன்ற ஒரு வீரரைத் தேர்வு செய்வேன். அவரை எல்லோரும் குறைத்து மதிப்பிடுகிறார்கள்" என்று தெரிவித்துள்ளார். பிரேஸ்வெல் இந்திய அணிக்கு எதிராக ஹைதராபாத்தில் ஒரு அற்புதமான சதத்தைப் பதிவு செய்தவர் என்றும், அவர் ஒரு சிறந்த ஆஃப் ஸ்பின் பந்துவீச்சாளர் மற்றும் பந்தை அடித்து ஆடக்கூடிய இடது கை பேட்ஸ்மேன் என்றும், ஒரு நல்ல ஃபினிஷராகச் செயல்பட முடியும் என்றும் அவர் சுட்டிக்காட்டினார்.
தோனி
தோனியின் வழிகாட்டுதல் பொருத்தமானது
மேலும், சிஎஸ்கே அணிக்கு ருதுராஜ் கெய்க்வாட், சஞ்சு சாம்சன், ஆயுஷ் மகாத்ரே மற்றும் உர்வில் படேல் ஆகியோருடன் நான்காவது இடம் வரை வலுவான பேட்டிங் வரிசை இருப்பதால், அவர்கள் பேட்டிங் குறித்து அதிகம் கவலைப்பட வேண்டியதில்லை என்றும் ஸ்ரீகாந்த் தெரிவித்தார். "பிரேஸ்வெல் ஊக்குவிக்கப்பட்டால், அவர் சிறப்பாகச் செயல்படுவார். எம்எஸ் தோனி போன்ற ஒருவரின் வழிகாட்டுதலில் அவர் ஒரு சிறந்த ஆல் ரவுண்டராக உருவாக்கப்படலாம்." என்று சிஎஸ்கே அணியின் சூழல் பிரேஸ்வெல்லுக்குச் சாதகமாக இருக்கும் என்று அவர் நம்பிக்கை தெரிவித்தார்.
எச்சரிக்கை
மற்ற வீரர்கள் குறித்து எச்சரிக்கை
பிரேஸ்வெல் இதற்கு முன்பு 2023 ஐபிஎல் சீசனில் ஆர்சிபி அணிக்காக ஐந்து போட்டிகளில் விளையாடி 58 ரன்கள் எடுத்ததுடன் ஆறு விக்கெட்டுகளையும் வீழ்த்தியுள்ளார். அவர் இந்த ஏலத்தில் ₹2 கோடி அடிப்படை விலையில் பதிவு செய்துள்ளார். பிரேஸ்வெல்லைத் தேர்வு செய்ய வலியுறுத்திய ஸ்ரீகாந்த், இந்திய லெக் ஸ்பின்னர் ரவி பிஷ்னோய் மற்றும் தென்னாப்பிரிக்காவின் டேவிட் மில்லர் ஆகியோரை ஏலத்தில் எடுக்க வேண்டாம் என்று சிஎஸ்கேவுக்கு எச்சரிக்கை விடுத்தார். மில்லர் சென்னை ஆடுகளத்திற்குப் பொருந்த மாட்டார் என்றும், அவருக்குப் பதிலாகப் பிரேஸ்வெல்லைத் தேர்வு செய்தால், அவர் பந்துவீச்சிலும் ஒரு பங்களிப்பைக் கொடுப்பார் என்றும் அவர் தெரிவித்தார்.