"14 அணிகள் இருந்தாலும்..." 2027 உலகக்கோப்பை தகுதிச் சுற்றில் ஐசிசி கொண்டு வந்துள்ள புதிய சூப்பர் சீரிஸ் மாற்றம்
செய்தி முன்னோட்டம்
சர்வதேச கிரிக்கெட் கவுன்சில் (ஐசிசி) வரும் 2027 ஆம் ஆண்டு நடைபெறவுள்ள ஆண்களுக்கான ஒருநாள் உலகக்கோப்பை தொடருக்கான தகுதிச் சுற்றுப் பாதையை திடீரென மாற்றியமைத்துள்ளது. புதிய விதிமுறைகளின்படி, 10 நாடுகள் பங்கேற்கும் உலகக்கோப்பை தகுதிச் சுற்றின் வெற்றியாளர் மட்டுமே முதன்மைப் போட்டிக்கு நேரடியாகத் தகுதி பெற முடியும். தகுதிச் சுற்றில் இரண்டு, மூன்று மற்றும் நான்காம் இடங்களைப் பிடிக்கும் அணிகள், முதன்மை சுற்றுக்கு முன்னேறுவதற்கு முன்பாக சூப்பர் சீரிஸ் எனப்படும் கூடுதல் பூர்வாங்க நிலைச் சுற்றில் விளையாட வேண்டும் என ஐசிசி அறிவித்துள்ளது.
தரவரிசை மற்றும் விதிகள்
செப்டம்பர் 2026 தரவரிசை மற்றும் நேரடித் தகுதிக்கான புதிய விதிகள்
இந்த புதிய தகுதிச் சுற்று மாதிரியின் கீழ் அணிகள் எவ்வாறு தேர்ந்தெடுக்கப்படும் என்ற விபரங்களும் வெளியிடப்பட்டுள்ளன.
வரும் செப்டம்பர் 2026 இன் இறுதியில், சர்வதேச ஒருநாள் தரவரிசையில் முதல் 8 இடங்களைப் பிடிக்கும் அணிகள் உலகக்கோப்பைக்கு நேரடியாகத் தகுதி பெறும்.
இவர்களுடன் இணைந்து தொடரை நடத்தும் மூன்று நாடுகளில் தென்னாப்பிரிக்கா மற்றும் ஜிம்பாப்வே ஆகிய இரண்டு நாடுகள் தரவரிசையைப் பொருட்படுத்தாமல் நேரடித் தகுதியை பெறுகின்றன.
ஆனால், மூன்றாவது நாடான நமீபியா தகுதிச் சுற்று பாதையின் வழியாக விளையாடி மட்டுமே உள்ளே வர முடியும்.
மீதமுள்ள இடங்களுக்கு உலகக்கோப்பை தகுதிச் சுற்று வெற்றியாளர் 11வது அணியாக நேரடியாக இணைவார்.
அசோசியேட் அணிகள்
குறைந்த வாய்ப்புகளுடன் அசோசியேட் அணிகளை சோதிக்கும் சூப்பர் சீரிஸ்
தகுதிச் சுற்றில் அடுத்தடுத்த இடங்களைப் பிடிக்கும் அணிகளுக்கு அறிமுகப்படுத்தப்பட்டுள்ள இந்த சூப்பர் சீரிஸ் சுற்று, வளர்ந்து வரும் அசோசியேட் நாடுகளிடையே பெரும் விவாதத்தை ஏற்படுத்தியுள்ளது.
தகுதிச் சுற்றின் 2, 3 மற்றும் 4வது இடங்களைப் பிடிக்கும் மூன்று குறைந்த ரேங்கிங் கொண்ட அணிகள் இந்தச் சுற்றில் இரண்டு போட்டிகள் கொண்ட ரவுண்ட்-ராபின் முறையில் மோத வேண்டும்.
இதில் முதலிடம் பிடிக்கும் ஒரே ஒரு அணி மட்டுமே 12 அணிகள் கொண்ட உலகக்கோப்பையின் முதன்மைச் சுற்றுக்கு முன்னேறும்.
மற்ற இரண்டு அணிகளும் வெறும் இரண்டு போட்டிகளோடு தொடரை விட்டு வெளியேற்றப்படும் என்பதால் இது வளர்ந்து வரும் அணிகளின் வாய்ப்புகளைப் பறிப்பதாக விமர்சனங்கள் எழுந்துள்ளன.
சூப்பர் 7 சுற்று
உலகக்கோப்பை தொடரில் அறிமுகமாகும் புதிய சூப்பர் 7 சுற்று
உலகக்கோப்பை முதன்மைத் தொடரின் வடிவத்திலும் ஐசிசி புதிய மாற்றங்களை உட்புகுத்தியுள்ளது.
தகுதிச் சுற்று முறைகளுக்குப் பிறகு முதன்மைத் தொடருக்குள் வரும் 12 அணிகளும் தலா 6 அணிகள் வீதம் இரண்டு குழுக்களாகப் பிரிக்கப்பட்டு லீக் போட்டிகளில் மோதும்.
அதன் பின்னர், ஒவ்வொரு குழுவிலும் முதல் 3 இடங்களைப் பிடிக்கும் அணிகளுடன், இரண்டு குழுக்களையும் சேர்த்து ஒட்டுமொத்தமாக அடுத்த சிறந்த ரேங்கிங்கில் இருக்கும் ஒரு அணியும் இணைந்து சூப்பர் 7 என்ற புதிய சுற்றுக்குத் தகுதி பெறும்.
இந்த ஏழு அணிகளும் தங்களுக்குள் ரவுண்ட்-ராபின் முறையில் ஒருமுறை மோதிய பிறகு, முதல் 4 இடங்களைப் பிடிக்கும் அணிகள் அரையிறுதிக்கு முன்னேறும்.
தேர்வு முறை
10 அணிகள் பங்கேற்கும் தகுதிச் சுற்றுக்கான தேர்வு முறை
2027 தொடக்கத்தில் நடைபெறவுள்ள இந்த 10 அணிகள் கொண்ட முதன்மை தகுதிச் சுற்றில் யார் யார் பங்கேற்பார்கள் என்ற பட்டியலும் தெளிவாக வரையறுக்கப்பட்டுள்ளது.
நேரடித் தகுதி பெறாத ஐசிசியின் முழுநேர உறுப்பினர்களில் மிகக் குறைந்த ரேங்கிங் கொண்ட 2 அணிகள், சிடபிள்யூசி லீக் 2 தொடரிலிருந்து தகுதி பெறும் முதல் 4 அணிகள் மற்றும் தகுதிச் சுற்று ப்ளே-ஆஃப் மூலம் முன்னேறும் 4 அணிகள் என மொத்தம் 10 அணிகள் இதில் களம் காணும்.
இந்த ப்ளே-ஆஃப் சுற்றானது லீக் 2 இன் கடைசி 4 அணிகள் மற்றும் சேலஞ்ச் லீக்கின் 4 அணிகளுக்கு இடையே நடத்தப்பட்டு தகுதிச் சுற்றுக்கான இறுதிப் பட்டியல் தயார் செய்யப்படும்.