ஆர்சிபி ரசிகரின் கோரிக்கையும் இணையத்தைக் கலக்கிய எம்.எஸ்.தோனியின் பதிலும்
2024ம் ஆண்டு ஐபிஎல்லுக்கான ஏலம் கடந்த சில தினங்களுக்கு முன்பு நடைபெற்று முடிந்தது. அனைத்து அணிகளும் தங்களுக்குத் தேவையான வீரர்களை வாங்கியிருக்கும் நிலையில், தோனி மற்றும் கிரிக்கெட் ரசிகர்களுக்கிடையிான சந்திப்பு ஒன்று நிகழ்ந்திருக்கிறது. இந்த சந்திப்பில் சென்னை சூப்பர் கிங்ஸ் அணியின் கேப்டனும், இந்திய அணியின் முன்னாள் ஸ்டார் வீரருமான தோனியிடம் ராயல் சேலஞ்சர்ஸ் பெங்களூரு அணியின் ரசிகர் ஒரு வைத்த கோரிக்கையும், அதற்கு தோனி அளித்த பதிலும் அடங்கிய காணொளி தற்போது இணையத்தில் வைரலாகியிருக்கிறது. அந்தக் உரையாடலில், "சிஎஸ்கே அணிக்காக 5 கோப்பைகளை வென்று கொடுத்திருக்கிறீர்கள், அதேபோல் ஆர்சிபி அணிக்கு வந்து ஆர்சிபிக்காக ஒரு கோப்பையை வென்று கொடுக்க முடியுமா?" எனக் கோரிக்கை விடுத்திருக்கிறார் ஆர்சிபி ரசிகர் ஒருவர்.
மகேந்திர சிங் தோனியின் பதில்:
ஆர்சிபி ரசிகரின் கோரிக்கைக்கு தோனி அளித்த பதிலே தற்போது இணையத்தில் பலராலும் அதிகமாகப் பகிரப்பட்டு வருகிறது. ஆர்சிபி ரசிகரின் கோரிக்கைக்கு, "ஆர்சிபி ஒரு சிறந்த அணி. ஐபிஎல்லில் கலந்து கொள்ளும் 10 அணிகளுக்குமே கோப்பை வெல்லும் வாய்ப்பு சரிசமமாகவே இருக்கிறது. அனைத்து அணிகளும் வலுவாகவே இருக்கின்றன. ஆனால், சில குறிப்பிட்ட வீரர்கள் காயம் காரணமாக அணியில் இருந்து விலகும் போது தான் பிரச்சினை உருவாகிறது." எனத் தெரிவித்துள்ளார். மேலும், "என்னுடைய அணியிலேயே நான் எதிர்கொள்ள வேண்டிய பிரச்சினைகள் நிறைய இருக்கிறது. அத்துடன் இந்த நேரத்தில் நான் வேறு ஒரு அணிக்கு சென்றால், எங்கள் ரசிகர்களுடைய மனநிலை எப்படி இருக்கும்?" எனத் தெரிவித்திருக்கிறார் 'தல' தோனி.
