விரைவில் ரிலையன்ஸ் ஜியோ மற்றும் ஏர்டெல் மொபைல் கட்டணங்கள் உயரக்கூடும்
விரைவில், ரிலையன்ஸ் ஜியோ மற்றும் ஏர்டெல் நிறுவனங்கள், கட்டணத்தை, 10 சதவீத அளவில் உயர்த்த வாய்ப்புள்ளதாக செய்திகள் தெரிவிக்கின்றன. இந்த விலை உயர்விற்கு, அந்நிறுவனங்களின் வருவாய் மற்றும் பொருளாதார நெருக்கடிகள் காரணமாக இருக்கலாம் என்று கூறப்படுகிறது. செப்டம்பர் காலாண்டில், ஏர்டெல், வோடபோன், ஐடியா மற்றும் ரிலையன்ஸ் ஜியோ அனைத்தும் மிதமான லாபத்தை பெற்றன. இது டெலிகாம் நிறுவனங்களின் லாபம், செயல்பாடுகள் ஆகியவற்றை அளவிடுவதில் முக்கிய அளவீடு ஆகும். இதன் தொடக்கமாக, ஏர்டெல் ஏற்கனவே மலிவான திட்டங்களை ரத்து செய்யத் தொடங்கியுள்ளது. நிறுவனத்தின் கிராமப்புற விரிவாக்கத் திட்டங்களுக்கு ஏற்ப தொடங்கப்பட்ட இந்த திட்டங்கள், இப்போது குறிப்பிட்ட சில பகுதிகளில் திரும்ப பெறப்பட்டுள்ளது .
ரிலையன்ஸ் ஜியோ மற்றும் ஏர்டெல் மொபைல் கட்டணங்கள்
அதோடு, கடந்த காலாண்டில், ஏர்டெல்லின் EBITDA மார்ஜின் 43.7 சதவீதத்திலிருந்து 36.9 சதவீதமாக சரிந்ததால், ஆய்வாளர்கள் விலையேற்றம் வரும் என்று உறுதியாக நம்புகின்றனர். 5G நெட்வொர்க்கிற்கான கட்டணங்களை, இந்நிறுவனங்கள் இன்னும் அறிவிக்கவில்லை. அதுவும் விலையேற்ற காரணியாக அமையலாம். ஜியோ, 2023 ஆம் ஆண்டு இறுதிக்குள், இந்தியாவின் அனைத்து நகரங்களையும் 5G திட்டத்தை விரிவுபடுத்த திட்டமிட்டுள்ளது. தற்போது, ஜியோ ட்ரூ 5ஜி, டெல்லி-என்சிஆர், மும்பை, கொல்கத்தா, வாரணாசி, சென்னை, பெங்களூரு, ஹைதராபாத், புனே, நாத்வாரா மற்றும் குஜராத்தில், ஆஃபருடன் வழங்குகிறது. மறுபுறம், இந்த ஆண்டு இறுதிக்குள், அனைத்து முக்கிய பெருநகரங்களிலும் இந்த சேவை தொடங்கப்படும் என்றும், அடுத்த ஆண்டு இறுதிக்குள் இந்தியாவின் அனைத்து முக்கிய நகரங்களிலும் 5G கவரேஜ் கிடைக்கும் என்றும் ஏர்டெல் கூறியுள்ளது.
