ககன்யான் விண்வெளி பயணத்துக்குத் தயாராகும் வீரர்கள் பட்டியலை இன்று பிரதமர் வெளியிடுவார்
இந்தியாவின் முதல் மனித விண்வெளிப் பயணமான ககன்யான் திட்டத்தின் ஒரு பகுதியாக, விண்வெளிக்குச் செல்ல தேர்வு செய்யப்பட்ட நான்கு இந்திய விண்வெளி வீரர்களின் பெயர்களை பிரதமர் நரேந்திர மோடி செவ்வாயன்று வெளியிடுவார் என்று இந்திய விண்வெளி ஆராய்ச்சி நிறுவனத்தின் (இஸ்ரோ) தலைவர் எஸ் சோமநாத் தெரிவித்தார். இன்று காலை 10.45 மணியளவில் திருவனந்தபுரத்தில் உள்ள விக்ரம் சாராபாய் விண்வெளி மையத்திற்கு (விஎஸ்எஸ்சி) தனது வருகையின் போது பிரதமர் இந்த அறிவிப்பை வெளியிடுவார் என அவர் தெரிவித்துள்ளார். சமூக ஊடகங்களில் வெளியிடப்பட்ட ஒரு வீடியோவில், இஸ்ரோ தலைவர், மோடி விண்வெளி வீரர்களை சந்திப்பதற்கு முன்னர், அவர்களின் பெயர்களை நாட்டிற்கு தெரிவிப்பார் என்று தெரிவித்தார்.
ககன்யான் திட்டம் எப்போது செயல்படும்?
ககன்யான் திட்டம், 2025இல் தொடங்கப்பட உள்ளது. மனிதர்களை விண்வெளிக்கு அனுப்பவும், அவர்களைப் பாதுகாப்பாக பூமிக்குத் திருப்பி அனுப்பவும், இந்திய கடல் பகுதியில் தரையிறங்கும் இஸ்ரோவின் திறனை நிரூபிப்பதை நோக்கமாகக் கொண்டுள்ளது. விஎஸ்எஸ்சி இன்று பார்வையிடும் பிரதமர் மோடி, விண்வெளித் துறைக்கு உலகத் தரம் வாய்ந்த தொழில்நுட்ப வசதிகளை வழங்குவதற்காக சுமார் ரூ.1,800 கோடி மதிப்பிலான மூன்று விண்வெளி உள்கட்டமைப்பு திட்டங்களையும் தொடங்கி வைக்கிறார். திட்டங்களில், ஸ்ரீஹரிகோட்டாவில் உள்ள சதீஷ் தவான் விண்வெளி மையத்தில் உள்ள PSLV ஒருங்கிணைப்பு வசதி (PIF), மகேந்திரகிரியில் உள்ள இஸ்ரோ ப்ராபல்ஷன் வளாகத்தில் புதிய 'அரை கிரையோஜெனிக்ஸ் ஒருங்கிணைந்த இயந்திரம் மற்றும் நிலை சோதனை வசதி'; மற்றும் VSSC இல் உள்ள 'ட்ரைசோனிக் விண்ட் டன்னல் ஆகியவை அடங்கும்
