2045-இல் விண்வெளியில் லட்சக்கணக்கான மக்கள் வசிப்பார்கள்! அமேசான் நிறுவனர் ஜெஃப் பெசோஸ் கணிப்பு
செய்தி முன்னோட்டம்
அமேசான் மற்றும் புளூ ஆரிஜின் நிறுவனங்களின் நிறுவனரான ஜெஃப் பெசோஸ், வரும் இரண்டு தசாப்தங்களுக்குள் (2045-க்குள்) மில்லியன் கணக்கான மக்கள் விண்வெளியில் வசிப்பார்கள் என அதிரடியாகக் கணித்துள்ளார். இத்தாலி டெக் வீக் நிகழ்வில் பங்கேற்று உரையாற்றிய அவர், செயற்கை நுண்ணறிவு, ரோபோடிக்ஸ் மற்றும் விண்வெளித் தொழில்நுட்பங்களின் அதிவேக வளர்ச்சியே மனிதகுலத்தை விண்வெளியை நோக்கி விரைவாக நகர்த்தும் என விளக்கமளித்தார். விண்வெளி ஆராய்ச்சித் துறையில் நிலவும் தொழில்நுட்ப வேகம் பலரும் எதிர்பார்ப்பதை விட மிகவும் வேகமாக உள்ளது என அவர் சுட்டிக்காட்டினார்.
நிலவு
நிலவில் பணிகளை மேற்கொள்ளப்போகும் அதிநவீன ரோபோக்கள்
நிலவின் மேற்பரப்பிலோ அல்லது விண்வெளியின் பிற பகுதிகளிலோ கடினமான மற்றும் ஆபத்தான பணிகளை செய்ய மனிதர்களை அனுப்புவதைக் காட்டிலும் ரோபோக்களைப் பயன்படுத்துவதே அதிகச் சிக்கனமானது என பெசோஸ் வாதிட்டுள்ளார்.
செயற்கை நுண்ணறிவின் உதவியுடன் இயங்கும் ரோபோக்கள் விண்வெளி ஆராய்ச்சியின் செலவுகளைப் பெருமளவில் குறைக்கும் என்றும் அவர் கூறினார்.
மனிதர்களை ஆபத்தான சூழலுக்குள் அனுப்புவதைத் தவிர்த்து, ரோபோடிக் அமைப்புகளைப் பயன்படுத்துவது விண்வெளி உள்கட்டமைப்பு மேம்பாட்டை மேலும் வேகப்படுத்தும் என்றும் அவர் நம்பிக்கை தெரிவித்தார்.
கட்டாயமில்லை
மக்களின் சொந்த விருப்பமே பிரதானம்
எதிர்காலத்தில் பூமியை விட்டு வெளியேறி விண்வெளியில் வாழ்வது என்பது மக்களின் சுய விருப்பத்தை சார்ந்த ஒன்றாகவே இருக்கும் எனப் பெசோஸ் தெளிவுபடுத்தியுள்ளார்.
"பூமியில் வாழ வழியில்லாமல் மக்கள் விண்வெளிக்குச் செல்ல வேண்டிய அவசியம் இல்லை.
அங்கு சென்று வாழ வேண்டும் என்ற ஆர்வம் உள்ளவர்களே அங்கு செல்வார்கள்." என்று அவர் குறிப்பிட்டார்.
மனித நாகரிகத்தின் அடுத்த கட்ட வளர்ச்சியாக விண்வெளி வாழ்விடம் உருவெடுக்குமே தவிர, அது எந்தவொரு நெருக்கடியின் காரணமாகவும் திணிக்கப்படாது என்று அவர் தனது உரையில் குறிப்பிட்டார்.
செயற்கை நுண்ணறிவு
செயற்கை நுண்ணறிவு குறித்த நேர்மறையான பார்வை
செயற்கை நுண்ணறிவு (ஏஐ) மனித வேலைவாய்ப்புகளைப் பறிக்கும் என்ற அச்சங்களுக்குப் பெசோஸ் மாற்றுக் கருத்தைத் தெரிவித்துள்ளார்.
"10,000 ஆண்டுகளுக்கு முன்பு மனிதன் கலப்பையைக் கண்டுபிடித்த போது நாகரிகத்தின் வளம் அதிகரித்தது.
அதேபோல புதிய கண்டுபிடிப்புகளே மனிதச் சமூகத்தின் பொருளாதாரத்தை உயர்த்துகின்றன" எனக் கூறினார்.
ஏஐ தொழில்நுட்பம் உலகளவில் உற்பத்தித் திறனை அதிகரித்து செல்வ செழிப்பை உருவாக்கும் என்றும், அதுவே மனித சமூகம் விண்வெளியை நோக்கிப் பயணிப்பதற்கான பொருளாதார வலிமையை வழங்கும் என்றும் அவர் நம்பிக்கை தெரிவித்தார்.