நாளை விண்வெளிக்கு பயணமாகிறார் சுபன்ஷு ஷுக்லா என அறிவித்த நாசா
செய்தி முன்னோட்டம்
பல தாமதங்களுக்குப் பிறகு, இந்திய விண்வெளி வீரர் குரூப் கேப்டன் சுபன்ஷு சுக்லாவை ஏற்றிச் செல்லும் AX -4 பணி ஜூன் 25 அன்று தொடங்கப்படும் என்று நாசா செவ்வாயன்று அறிவித்தது. முன்னதாக ஜூன் 22 ஆம் தேதி திட்டமிடப்பட்டிருந்த தனியார் பயணம் ஏழாவது முறையாக ஒத்திவைத்த பிறகு நாசாவின் இந்த லேட்டஸ்ட் அறிவிப்பு வந்துள்ளது. ஆரம்பத்தில் மே 29 அன்று தொடங்க திட்டமிடப்பட்டிருந்த Ax-4 பணியின் ஏவுதல், தொழில்நுட்ப சிக்கல்கள், வானிலை மற்றும் சர்வதேச விண்வெளி நிலையத்தில்(ISS) ஏற்பட்ட கசிவுகள் காரணமாக மீண்டும் மீண்டும் தாமதமாகி வருகிறது. நாசா, ஆக்ஸியம் ஸ்பேஸ் மற்றும் ஸ்பேஸ்எக்ஸ் ஆகியவை புதன்கிழமை மதியம் 12:01 மணிக்கு (இந்திய நேரப்படி) இந்த பணியைத் தொடங்க இலக்கு வைத்துள்ளன.
அறிக்கை
நாசாவின் அறிக்கை
"இந்தப் பணி புளோரிடாவில் உள்ள நாசாவின் கென்னடி விண்வெளி மையத்தில் உள்ள ஏவுதள வளாகம் 39A இலிருந்து புறப்படும். நிறுவனத்தின் பால்கன் 9 ராக்கெட்டில் ஏவப்பட்ட பிறகு, குழுவினர் புதிய ஸ்பேஸ்எக்ஸ் டிராகன் விண்கலத்தில் சுற்றுப்பாதை ஆய்வகத்திற்கு பயணிப்பார்கள். இலக்கு வைக்கப்பட்ட சேரும் நேரம் ஜூன் 26 வியாழக்கிழமை மாலை 4:30 மணி (இந்திய நேரம்) ஆகும்," என்று நாசா ஒரு அறிக்கையில் தெரிவித்துள்ளது.
டைம்லைன்
Ax-4 பணியின் தொடர் தாமதங்கள்
முதலில் க்ரூ டிராகனின் மின் இணைப்பில் ஏற்பட்ட சிக்கல்கள் காரணமாக ஜூன் 8 ஆம் தேதிக்கு ஒத்திவைக்கப்பட்டது. பின்னர் பால்கன்-9 ராக்கெட் தயார்நிலை தாமதங்களை எதிர்கொண்டதால் ஜூன் 9 ஆம் தேதிக்கு தள்ளிவைக்கப்பட்டது. பின்னர், மோசமான வானிலை காரணமாக ஏவுதலின் தேதி ஜூன் 10 ஆம் தேதிக்கு தள்ளப்பட்டது. ஏவுதலுக்கு முந்தைய சோதனைகளின் போது ஆக்ஸிஜன் கசிவு ஏற்பட்டதால், ஏவுதலின் தேதி ஜூன் 11 க்கும், பின்னர் ஜூன் 12 க்கும் மாற்றப்பட்டது. பின்னர் ISS இல் கசிவுகள் கண்டறியப்பட்ட பின்னர், ஜூன் 22 க்கு தள்ளி வைக்கப்பட்டது.
குழு
அக்ஸியம் ஸ்பேஸ் குழுவினர்
நாசாவின் முன்னாள் விண்வெளி வீரரும், தற்போது ஆக்ஸியம் ஸ்பேஸில் மனித விண்வெளிப் பயண இயக்குநருமான பெக்கி விட்சன், வரவிருக்கும் வணிகப் பயணத்திற்கு தளபதியாக தலைமை தாங்குவார். இஸ்ரோ விண்வெளி வீரர் சுபன்ஷு சுக்லா இந்த பயணத்தின் பைலட்டாகப் பணியாற்ற உள்ளார். அவர்களுடன் ஐரோப்பிய விண்வெளி ஏஜென்சியின் (ESA) திட்ட விண்வெளி வீரரான போலந்தைச் சேர்ந்த சவோஸ் உஸ்னாஸ்கி-வினீவ்ஸ்கி மற்றும் ஹங்கேரியைச் சேர்ந்த திபோர் கபு ஆகியோர் மிஷன் நிபுணர்களாக இணைகிறார்கள்.