AR ஹெட்செட் உருவாக்கும் திட்டத்தை கைவிடும் கூகுள், அடுத்து என்ன?
செய்தி முன்னோட்டம்
கடந்த மார்ச்சில், தங்களுடைய 'கூகுள் கிளாஸ்' திட்டத்தை கைவிடுவதாக அறிவித்தது கூகுள். சாதாரண கண் கண்ணாடியைப் போலவே தோற்றம் கொண்ட, மொபைலுடன் இணைந்து செயல்படும் வகையில், ஸ்மார்ட்கிளாஸைப் போல செயல்படக்கூடிய வகையில் கூகுள் கிளாஸை உருவாக்கி வந்தது கூகுள்.
அதனைத் தொடர்ந்து, ஆப்பிள் மற்றும் மெட்டாவைப் போல AR ஹெட்செட்டில் கூகுள் தங்களது கவனத்தை செலுத்தும் என எதிர்பார்க்கப்பட்டது. ஆனால், தற்போது 'புராஜெக்ட் ஐரிஸ்' என்ற பெயரில் செயல்படுத்தி வந்த AR ஹெட்செட்டை உருவாக்கும் திட்டத்தையும் அந்நிறுவனம் கைவிட்டிருப்பதாகத் தகவல் வெளியாகியிருக்கிறது.
புராஜெக்ட் ஐரிஸூக்கு தலைமை தாங்கி வந்த கிளே பேவர் மற்றும் முக்கிய பொறியாளர்கள் சிலர் நிறுவனத்திலிருந்து விலகி சில மாதங்கள் கடந்திருக்கும் நிலையில், தற்போது இந்த முடிவை எடுத்திருக்கிறது கூகுள்.
கூகுள்
கூகுளின் அடுத்த திட்டம் என்ன?
தங்களுடைய AR ஹார்டுவேர் தயாரிப்பை தற்சமயம் மூட்டை கட்டி வைத்திருக்கும் கூகுள், AR ஹெட்செட்களுக்கான மென்பொருள் தயாரிப்பில் கவனம் செலுத்தவிருக்கிறது.
இந்த ஆண்டுத் தொடக்கத்தில், குவால்காம், சாம்சங் மற்றும் கூகுள் ஆகிய நிறுவனங்கள் இணைந்து புதிய மிக்ஸ்டு ரியாலிட்டி ஹெட்செட்டை உருவாக்கவிருப்பதாக அறிவித்திருந்தார்கள்.
ஹெட்செட்டுக்கான சிப்பை குவால்காமும், ஹார்டுவேரை சாம்சங்கும், சாஃப்ட்வேரை கூகுளும் வடிவமைக்கத் திட்டமிடப்பட்டிருக்கிறது. இதற்காக மறுவடிவமைக்கப்பட்ட ஆண்ட்ராய்டு போன்ற இயங்குதளத்தை உருவாக்கத் திட்டமிட்டிருக்கிறது கூகுள்.
அது மட்டுமின்றி, இனி வருங்காலத்தில் உருவாக்கப்படவிருக்கும் AR/VR ஹெட்செட்களும் பயன்படுத்தும் வகையிலான ஹெட்செட்டுக்கான இயங்குதளம் ஒன்றையும் உருவாக்கத் திட்டமிட்டு வருகிறது கூகுள்.