X தள கிரியேட்டர்களுக்கு குட் நியூஸ்; லைக் பட்டனை லாங் பிரஸ் செய்தால் $1 டிப்ஸ் அனுப்பலாம்
செய்தி முன்னோட்டம்
டெஸ்லா மற்றும் ஸ்பேஸ் எக்ஸ் தலைவரான எலான் மஸ்க், எக்ஸ் (X) சமூக வலைதள பயனர்கள் மற்ற பயனர்களுக்கும் மற்றும் கிரியேட்டர்களுக்கும் எளிதாக $1 அமெரிக்க டாலர் நிதியுதவி அனுப்பும் புதிய வசதியை அறிவித்துள்ளார். அக்டோபர் 25 அன்று எக்ஸ் தளத்தில் அவர் வெளியிட்ட பதிவில், லைக் பட்டனை நீண்ட நேரம் அழுத்திப் பிடிப்பதன் மூலம் X Money வழியாக $1 கட்டணத்தை நேரடியாக அனுப்ப முடியும் எனக் குறிப்பிட்டுள்ளார். இப்புதிய அம்சம் சமூக வலைத்தளப் பயன்பாட்டை நிதி பரிவர்த்தனையுடன் நேரடியாக இணைக்கிறது.
நிதி சேவைகள்
X Money தளம் மற்றும் அதன் பிரத்யேக நிதி சேவைகள்
இந்த சேவை எக்ஸ் தளத்தின் அதிகாரப்பூர்வ நிதி செயலியான X Money மூலம் முழுமையாக செயல்படுத்தப்படவுள்ளது.
2026 ஜூலை மாதம் அமெரிக்காவில் தொடங்கப்பட்ட இந்த சேவை, பயனர்களுக்கு இடையே பணப்பரிமாற்றம், வைப்புத்தொகை கணக்குகள் மற்றும் எக்ஸ் பிராண்டட் விசா டெபிட் கார்டு வசதிகளை வழங்கி வருகிறது.
கிராஸ் ரிவர் வங்கியின் உள்கட்டமைப்பு ஆதரவுடன் இயங்கும் இந்த எக்ஸ் மணி சேவையின் மூலம், பயனர்கள் தாங்கள் விரும்பும் உள்ளடக்கத்தை உருவாக்கும் கிரியேட்டர்களுக்கு எவ்வித கூடுதல் சிரமமுமின்றி நேரடியாக $1 தொகையை உடனடியாக அனுப்ப முடியும்.
எவரிதிங் ஆப்
எவரிதிங் ஆப் உருவாக்கத்தை நோக்கிய எலான் மஸ்க்
ட்விட்டர் நிறுவனத்தைக் கைப்பற்றியதில் இருந்தே, அதனை சமூக வலைதளம், தகவல் பரிமாற்றம் மற்றும் வங்கி நிதி சேவைகள் அனைத்தும் உள்ளடக்கிய ஒரே எவரிதிங் ஆப்பாக (Everything App) மாற்ற எலான் மஸ்க் தீவிரமாக முயன்று வருகிறார்.
தற்பொழுது கொண்டு வரப்பட்டுள்ள $1 டிப்பிங் வசதி அந்தப் பெரிய திட்டத்தின் மிக முக்கியமான அடுத்தகட்ட வளர்ச்சியாகும்.
இதன் மூலம் பயனர்கள் தனித்துவமான அல்லது பயனுள்ள தகவல்களைப் பகிரும் கிரியேட்டர்களுக்கு உடனடி நிதி ஆதரவை வழங்கி அவர்களை ஊக்கப்படுத்த முடியும் எனக் கருதப்படுகிறது.
இந்தியா
இந்தியாவில் இந்த சேவையின் வருகை மற்றும் தற்போதைய நிலை
தற்போதைக்கு இப்புதிய $1 டிப்பிங் வசதி மற்றும் X Money சேவைகள் அமெரிக்காவில் உள்ள தகுதியான பயனர்களுக்கு மட்டுமே முதற்கட்டமாகக் கிடைக்கப்பெறும் எனத் தெரிவிக்கப்பட்டுள்ளது.
இந்தியாவில் யுபிஐ டிஜிட்டல் பரிவர்த்தனை அமைப்பு ஏற்கனவே வலுவாக செயல்பட்டு வரும் சூழலில், இந்தியாவில் இந்த சேவை எப்போது அறிமுகமாகும் என்பது குறித்து எக்ஸ் நிறுவனம் இன்னும் அதிகாரப்பூர்வ தகவல்களை வெளியிடவில்லை.
எனினும், எக்ஸ் தளத்தின் இந்த டிஜிட்டல் பணப்பரிமாற்ற முயற்சி உலகளாவிய அளவில் மிகப்பெரிய மாற்றத்தை ஏற்படுத்தும் என எதிர்பார்க்கப்படுகிறது.