'ChatGPT மனிதர்களுக்கு மாற்றா'... இன்ஃபோசிஸ் நாராயண மூர்த்தியின் பதில்!
மனிதர்களின் வேலையை AI-க்கள் எடுத்துக் கொள்ளுமா என்ற விவாதம் சமீபத்தில் அதிகமாகியிருக்கிறது. அதற்கு முக்கியக் காரணம் சாட்ஜிபிடி-யின் வரவு. சாட்ஜிபிடி போன்ற AI-க்கள் மனிதர்களைப் போலவே சிந்திக்க பயிற்சியளிக்கப்படுகின்றன. எனவே, அது குறித்த சிறு அச்சமும் எழுந்திருக்கிறது. இந்நிலையில், இன்ஃபோசிஸ் நிறுவனத்தின் முன்னாள் தலைமை செயல் அதிகாரியான நாராயாண மூர்த்தியிடம் இது குறித்த கேள்வி ஒன்று கேட்கப்பட்டது. உலகில் மிகவும் மதிப்புடைய தொழில்நுட்ப நிறுவனங்களின் பட்டியலில் மூன்றாவது இடத்தில் இருக்கிறது இன்ஃபோசிஸ். 13 பில்லியன் அமெரிக்க டாலர்கள் மதிப்புடைய அந்நிறுவனம் தான் 1999-ல் அமெரிக்க பங்குச்சந்தையான நாஷ்டாக்கில் முதலில் பட்டியலிடப்பட்ட இந்திய நிறுவனம் என்ற பெயரைப் பெற்றது. 2012-ல் அமெரிக்காவின் மற்றொரு பங்குச்சந்தையான நியூயார்க் ஸ்டாக் எக்ஸ்சேஞ்சிலும் பட்டியலிடப்பட்டது.
மூர்த்தியிடம் கேட்கப்பட்ட கேள்வி!
அவரிடம், 'மனிதர்களுக்கு மாற்றாக சாட்ஜிபிடி வருமா?' என்ற கேள்வி ஒரு நேர்காணலில் கேட்கப்பட்டது. அதற்கு பதிலளித்த அவர், "AI-க்களால் எப்போதும் மனித மூளையை மிஞ்ச முடியாது. சாட்ஜிபிடியைப் பற்றி நான் பெரிதாகக் கவலைப்படவில்லை. மனித மூளையை விட சக்திவாயந்ததாக வேறொன்றை நான் பார்க்கவில்லை. சாட்ஜிபிடியை ஒரு கருவியாக மட்டுமே நான் பார்க்கிறேன். அந்தக் கருவியைக் கொண்டு என்னுடைய வேலையை இன்னும் எப்படி மெருகேற்றுவது என்று தான் நான் சிந்திப்பேனே ஒழிய, மனிதர்களுக்கு மாற்றாக அவற்றை நான் ஒரு போதும் நினைக்க மாட்டேன்" எனத் தெரிவித்துள்ளார்.
