உலக எய்ட்ஸ் நாள் 2025: இந்தியாவில் எச்ஐவி தடுப்பில் பிரபலமாகி வரும் PrEP தடுப்பூசி; முழு விபரம்

எழுதியவர் Sekar Chinnappan

Dec 01, 2025

10:00 am

செய்தி முன்னோட்டம்

உலக எய்ட்ஸ் நாள் திங்கட்கிழமை (டிசம்பர் 1) அனுசரிக்கப்படும் நிலையில், இந்தியாவில் எச்ஐவி தடுப்பு முறைகள் குறித்த விழிப்புணர்வு அதிகரித்து வருகிறது. இதில், PrEP (Pre-Exposure Prophylaxis) எனப்படும் தடுப்பு மருந்துத் தேர்வு குறித்துப் பரவலான உரையாடல்கள் எழுந்துள்ளன. மக்கள் பாதுகாப்பான, விவேகமான மற்றும் தங்களது கட்டுப்பாட்டில் உள்ள தடுப்பு முறைகளை விரும்புவதால், மருத்துவர்களின் ஆலோசனைகள் மற்றும் சமூக ஊடக விவாதங்களில் PrEP இன் தேவை அதிகரித்து வருகிறது.

விபரம்

PrEP என்றால் என்ன?

PrEP என்பது எச்ஐவி (HIV) தொற்று ஏற்படக்கூடிய அபாயத்திற்கு முன்னதாக எடுத்துக்கொள்ளப்படும் மருந்து ஆகும். இது தினமும் எடுத்துக்கொள்ளும் மாத்திரையாகவும், சில மாதங்களுக்கு ஒருமுறை செலுத்தப்படும் நீண்ட கால ஊசியாகவும் (Long-acting injections) கிடைக்கிறது. முறையாகப் பயன்படுத்தும்போது, இந்த இரண்டு வழிகளும் தொற்று ஏற்படுவதைத் தடுப்பதில் மிகச் சிறந்த பாதுகாப்பை வழங்குகின்றன. எச்ஐவிக்கு ஆளாகும் வாய்ப்பு அதிகம் உள்ளவர்களுக்கு PrEP பரிந்துரைக்கப்படுகிறது. தற்போதுள்ள காண்டம், பரிசோதனை மற்றும் சிகிச்சை போன்ற தடுப்பு நடவடிக்கைகளுடன், PrEPம் நவீன எச்ஐவி தடுப்பில் அத்தியாவசிய அங்கமாக மாறி வருகிறது என்று சுகாதார நிபுணர்கள் தெரிவிக்கின்றனர்.

காரணம்

தேவை அதிகரிப்பதன் காரணம்

இந்தியாவில் PrEPக்கான ஆர்வம் அதிகரிப்பதற்கு, பாலியல் ஆரோக்கியம் குறித்த விழிப்புணர்வு கூடியிருப்பது முக்கியக் காரணம். பலரும், தங்கள் துணையின் நடத்தை அல்லது காண்டம் பயன்படுத்துவதில் மட்டும் நம்பிக்கை கொள்ளாமல், தங்களுக்கு அதிகப் பாதுகாப்பை உறுதிப்படுத்தும் விருப்பத் தேர்வுகளை நாடுவதே இதற்கு முக்கிய காரணமாக உள்ளது. அரசாங்கத்தின் வழிகாட்டுதல்கள் மற்றும் முன்னோடித் திட்டங்கள் PrEPஐ மருத்துவ உரையாடல்களில் கொண்டு வந்துள்ளதால், மருத்துவர்கள் இதைப் பரிந்துரைக்கத் தயங்குவதில்லை. மேலும், மாத்திரை எடுத்துக்கொள்வதில் சிரமம் உள்ளவர்களுக்கு நீண்ட கால ஊசி வடிவிலான PrEP அறிமுகப்படுத்தப்பட்டது கூடுதல் கவனத்தைப் பெற்றுள்ளது. பொதுச் சுகாதார விழிப்புணர்வுப் பிரச்சாரங்கள் மூலம் PrEP பாதுகாப்பானது, விவேகமானது மற்றும் மிகவும் பயனுள்ளது என்று மக்கள் அறிந்துகொள்வதால், இது ஒரு பிரபலமான தேர்வாக மாறி வருகிறது.