அதீத வெப்பம்: முதியவர்களுக்கு ஆண்டுக்கு 900 மணிநேரம் ஆபத்து! கோப்பர்நிக்கஸ் தரவு வெளியிட்ட அதிர்ச்சித் தகவல்

எழுதியவர் Sekar Chinnappan

Mar 13, 2026

08:47 am

செய்தி முன்னோட்டம்

ஐரோப்பிய காலநிலை முகமையான கோப்பர்நிக்கஸ் தரவுகளைக் கொண்டு நடத்தப்பட்ட புதிய ஆய்வில், உலகெங்கும் நிலவும் அதீத வெப்பம் காரணமாக முதியவர்கள் ஆண்டுக்குச் சராசரியாக 900 மணிநேரம் கடும் உடல்நலப் பாதிப்புகளையும், வாழ்வாதாரக் கட்டுப்பாடுகளையும் எதிர்கொள்வதாகத் தெரியவந்துள்ளது. கூடுதல் விவரங்கள் இங்கே:-

உண்மைகள்

ஆய்வு சொல்லும் அதிர்ச்சி உண்மைகள்

சுற்றுச்சூழல் மற்றும் சுகாதார ஆராய்ச்சி இதழில் வெளியிடப்பட்ட இந்த ஆய்வின்படி, முதியவர்கள் (65+ வயது) ஆண்டுக்குச் சராசரியாக 900 மணிநேரம் அதீத வெப்பத்தால் பாதிக்கப்படுகின்றனர். இவர்களால் சாதாரண அன்றாடப் பணிகளைக் கூடச் செய்ய முடியாத சூழல் உருவாகிறது. இளைஞர்களுக்கு (18-40 வயது) ஆண்டுக்குச் சராசரியாக 50 மணிநேரம் வெப்பக் கட்டுப்பாடுகள் ஏற்படுகின்றன. உலகின் 78% மக்கள் முதியவர்களின் செயல்பாடுகளை முடக்கும் வெப்பம் நிறைந்த பகுதிகளிலும், 35% மக்கள் இளைஞர்களைப் பாதிக்கும் பகுதிகளிலும் வசிக்கின்றனர்.

திறன்

வாழ்வாதாரத் திறன் என்றால் என்ன?

உடலில் வெப்பத்தை உருவாக்கும் அன்றாட உடற்பயிற்சிகள் அல்லது வேலைகளைச் செய்யும்போது, எந்தவிதமான உடல்நலப் பாதிப்பும் (மயக்கம், சோர்வு போன்றவை) ஏற்படாமல் இருப்பதே 'வாழ்வாதாரத் திறன்' என வரையறுக்கப்படுகிறது. தற்போதைய வெப்பம், வெப்ப மண்டலப் பகுதிகளில் வசிப்பவர்கள் வெறும் அமர்ந்திருக்கவோ அல்லது படுத்திருக்கவோ மட்டுமே அனுமதிக்கிறது. இந்த ஆய்வின்படி, தெற்காசியா (இந்தியா, பாகிஸ்தான், பங்களாதேஷ்) மற்றும் தென்மேற்கு ஆசியா (கத்தார், குவைத், யுஏஇ) ஆகிய நாடுகள் மிக மோசமான பாதிப்புகளைச் சந்திக்கின்றன. தென்மேற்கு ஆசியாவில் இளைஞர்கள் ஆண்டுக்கு 1,000 மணிநேரத்திற்கும் மேலாகப் பாதிக்கப்படுகின்றனர். முதியவர்களைப் பொறுத்தவரை, ஆண்டுக்கு 1,500 முதல் 2,000 மணிநேரம் வரை (அதாவது பகல் நேரத்தின் பாதி அளவு) அதீத வெப்பத்தால் அவர்களது இயல்பு வாழ்க்கை முடக்கப்படுகிறது.

எச்சரிக்கை

எதிர்கால எச்சரிக்கை

பூமி வெப்பமடைவது தொடர்ந்து அதிகரித்தால், ஏற்கனவே வெப்பம் அதிகமாக உள்ள தெற்காசியப் பகுதிகளில் மக்கள் தொகை வளர்ச்சியும் அதிகமாக இருப்பதால், பாதிப்புகள் பலமடங்கு உயரும் என்று ஆராய்ச்சியாளர்கள் எச்சரிக்கின்றனர். கரியமில வாயு வெளியேற்றத்தைக் குறைப்பது மட்டுமே இதற்குத் தீர்வாக அமையும்.