கழிவறைக்குள் மொபைல் போன் பயன்படுத்துபவரா நீங்கள்? நிபுணர்கள் சொல்வதை கேளுங்க
செய்தி முன்னோட்டம்
சமீபத்திய ஆய்வுகள் மற்றும் சுகாதார ஆலோசனைகளின்படி, மக்கள் தங்கள் மொபைல் ஃபோன்களைக் கழிவறைக்குள் எடுத்துச் செல்வது கடுமையான உடல்நல அபாயங்களை விளைவிக்கும் என்று சுகாதார நிபுணர்கள் எச்சரிக்கின்றனர். இது ஒரு பொதுவான பழக்கமாக மாறியுள்ள நிலையில், இது கிருமிகள் மற்றும் நோய்க்கிருமிகள் பரவுவதற்கான முக்கிய வழியாகச் செயல்படுகிறது என்றும் அவர்கள் சுட்டிக் காட்டுகின்றனர். நாம் ஃபிளஷ் செய்யும்போதும் அல்லது கைகளைக் கழுவும்போதும், காற்றில் பரவும் கிருமிகள் மற்றும் நுண்ணுயிரிகள் மொபைல் போனின் மேற்பரப்பில் ஒட்டிக்கொள்ள அதிக வாய்ப்புள்ளது. ஆய்வுகளின்படி, சால்மோனெல்லா, ஈ.கோலை மற்றும் சி.டிஃபிசைல் போன்ற அபாயகரமான பாக்டீரியாக்கள் மொபைல் போன்களின் திரைகளில் கண்டறியப்பட்டுள்ளன. இந்தப் பாக்டீரியாக்கள் செரிமானக் கோளாறுகள் மற்றும் கடுமையான நோய்த்தொற்றுகளை ஏற்படுத்தக்கூடும்.
கிருமிகள்
மொபைல் மூலம் கிருமிகள் உடலில் நுழைவு
மருத்துவ நிபுணர்கள் அறிக்கையின்படி, கழிவறையில் இருந்து வெளியே வந்த பிறகு நாம் கைகளை மட்டுமே கழுவுகிறோம். ஆனால், நாம் கையாண்ட ஃபோனைக் கழுவுவதில்லை. சுத்தப்படுத்தப்படாத ஃபோனை மீண்டும் நம் முகம் மற்றும் வாய் அருகே கொண்டு வரும்போது, கிருமிகள் எளிதில் நம் உடலுக்குள் நுழைந்துவிடும். இந்தப் பழக்கத்தைக் கைவிடுவதன் அவசியத்தை வலியுறுத்தும் நிபுணர்கள், மொபைல் ஃபோன்களைக் கழிவறைக்கு வெளியில் வைக்குமாறும், ஃபோன் அவசியமானால், அவ்வப்போது ஆல்கஹால் அடிப்படையிலான துடைப்பான்களைப் பயன்படுத்திச் சுத்தப்படுத்துமாறும் பொதுமக்களுக்கு அறிவுறுத்தியுள்ளார். இது நம்மை நாமே நோய்த்தொற்றுகளிலிருந்து பாதுகாத்துக் கொள்ளும் எளிய, ஆனால் முக்கியமான சுகாதாரப் பழக்கம் என்றும் நிபுணர்கள் தெரிவிக்கின்றனர்.