பீரியட்ஸ் நேரத்தில் இதைப் பண்றீங்களா? 24 மணிநேரம் ஒரே 'பேட்' பயன்படுத்துவது எவ்வளவு ஆபத்து தெரியுமா? உஷார் பெண்களே
செய்தி முன்னோட்டம்
மாதவிடாய் காலத்தில் பெண்கள் தங்களது உடல் நலம் மற்றும் தூய்மையில் அதிக கவனம் செலுத்த வேண்டியது அவசியம். ஆனால், பல பெண்கள் வேலைப்பளு அல்லது போதிய விழிப்புணர்வு இல்லாத காரணத்தினால், ஒரே சானிட்டரி பேடை நாள் முழுவதும் அல்லது 24 மணிநேரம் வரை மாற்றாமல் பயன்படுத்துகின்றனர். இது சாதாரண விஷயமாகத் தோன்றினாலும், நீண்ட கால அடிப்படையில் பெண்களுக்குத் தேவையற்ற பல ஆரோக்கியக் குறைபாடுகளை ஏற்படுத்தும் என்று மகப்பேறு மருத்துவர்கள் எச்சரிக்கின்றனர்.
தொற்று
பாக்டீரியா தொற்று மற்றும் அரிப்பு
மாதவிடாய் ரத்தம் நீண்ட நேரம் தோலுடன் தொடர்பில் இருக்கும்போது, அந்த இடத்தில் ஈரப்பதம் மற்றும் வெப்பம் அதிகமாக இருக்கும். இது பாக்டீரியா மற்றும் பூஞ்சைகள் வேகமாக வளர்வதற்கு உகந்த சூழலை உருவாக்குகிறது. இதனால் பிறப்புறுப்புப் பகுதியில் அரிப்பு, தடிப்புகள், சிவந்து போதல் மற்றும் எரிச்சல் போன்ற பாதிப்புகள் ஏற்படும். ஒரே பேடை நீண்ட நேரம் பயன்படுத்துவதால் துர்நாற்றம் ஏற்படுவது மட்டுமின்றி, சருமத்தில் சிறிய காயங்கள் அல்லது உராய்வுகள் ஏற்படவும் வாய்ப்புள்ளது.
சிறுநீரகம்
சிறுநீரகத் தொற்று மற்றும் பிற நோய்கள்
சரியான இடைவெளியில் பேட்களை மாற்றாதது சிறுநீரகப் பாதை தொற்று மற்றும் பிறப்புறுப்புத் தொற்றுகளுக்கு மிக முக்கியக் காரணமாகிறது. பிறப்புறுப்பின் இயற்கையான pH அளவை இது பாதிப்பதால், மீண்டும் மீண்டும் தொற்று ஏற்பட வாய்ப்புள்ளது. பல பெண்கள் மாதவிடாய் காலத்தில் ஏற்படும் அரிப்பு அல்லது எரிச்சலை சாதாரணமானது என்று நினைக்கின்றனர். ஆனால், இவை முறையற்ற சுகாதாரத்தைப் பின்பற்றுவதன் எச்சரிக்கை அறிகுறிகளே அன்றி, மாதவிடாயின் ஒரு பகுதி அல்ல என்று மருத்துவர்கள் தெளிவுபடுத்துகின்றனர்.
நேரம்
எவ்வளவு நேரத்திற்கு ஒருமுறை மாற்ற வேண்டும்?
சிறந்த ஆரோக்கியத்தைப் பேண, ஒரு சானிட்டரி பேடை ரத்தப்போக்கு குறைவாக இருந்தாலும் 4 முதல் 6 மணிநேரத்திற்கு ஒருமுறை மாற்ற வேண்டும் என்று மகப்பேறு மருத்துவர்கள் பரிந்துரைக்கின்றனர். இது பாக்டீரியா வளர்ச்சியைத் தடுத்து, தொற்று ஏற்படாமல் பாதுகாக்கும். மாதவிடாய் காலத்தில் உடலைப் பராமரிப்பது என்பது வெறும் சவுகரியத்திற்காக மட்டுமல்ல, அது ஒட்டுமொத்தப் பெண் ஆரோக்கியத்தின் அடிப்படைத் தேவையாகும்.