யுபிஎஸ்சி தேர்வில் முறைகேடுகளுக்கு முற்றுப்புள்ளி வைக்க களமிறங்கும் அதிநவீன ஃபேஷியல் ரெகக்னிஷன் தொழில்நுட்பம்
செய்தி முன்னோட்டம்
மத்திய பொதுப்பணியாளர் தேர்வாணையம் (யுபிஎஸ்சி), தான் நடத்தும் சிவில் சர்வீஸ் உள்ளிட்ட பல்வேறு போட்டித் தேர்வுகளின் நம்பகத்தன்மையை உறுதி செய்யவும், ஆள்மாறாட்டம் போன்ற முறைகேடுகளைத் தடுக்கவும் அதிரடி நடவடிக்கையை எடுத்துள்ளது. இதன்படி, தேர்வர்களின் அடையாளத்தைச் சரிபார்க்க முக அங்கீகாரத் தொழில்நுட்பம் (Facial Recognition Technology) மற்றும் ஆதார் சார்ந்த கைரேகை சரிபார்ப்பு (Aadhaar-based Fingerprint Authentication) முறையை இனி நடைமுறைப்படுத்த உள்ளது. இதன்படி, தேர்வு மையத்திற்குள் நுழையும் ஒவ்வொரு தேர்வரின் முகமும் இந்தத் தொழில்நுட்பம் மூலம் ஸ்கேன் செய்யப்படும். இது விண்ணப்பத்தின் போது சமர்ப்பிக்கப்பட்ட புகைப்படத்துடன் ஒத்துப் போகிறதா என்பதைத் துல்லியமாகச் சரிபார்க்கும்.
முற்றுப்புள்ளி
முறைகேடுகளுக்கு முற்றுப்புள்ளி
இதற்காகத் தேர்வு மையங்களில் தகுந்த மென்பொருள் மற்றும் கேமரா வசதிகளை நிறுவுவதற்கான ஏலப்புள்ளிகளை (Tenders) யுபிஎஸ்சி கோரியுள்ளது. இதன் மூலம் உண்மையான தேர்வர் மட்டுமே தேர்வு எழுதுவதை உறுதி செய்ய முடியும். சமீபகாலமாகப் பல்வேறு போட்டித் தேர்வுகளில் ஆள்மாறாட்டம் மற்றும் போலி அடையாள அட்டைகளைப் பயன்படுத்தி தேர்வு எழுதும் புகார்கள் அதிகரித்து வரும் நிலையில், யுபிஎஸ்சி இந்தத் தொழில்நுட்பத் தீர்வை முன்னெடுத்துள்ளது. கைரேகை மற்றும் முக அடையாளம் ஆகிய இரு அடுக்குச் சரிபார்ப்பு முறை இருப்பதால், தேர்வில் எவ்வித மோசடிகளும் செய்ய முடியாத சூழல் உருவாகும். இது நேர்மையாகத் தேர்வு எழுதும் மாணவர்களுக்குப் பெரும் பாதுகாப்பாக அமையும்.
பின்னணி
அமலாக்கமும் பின்னணியும்
இந்தத் தொழில்நுட்பம் சிவில் சர்வீஸ் தேர்வுகள் மட்டுமின்றி, யுபிஎஸ்சி நடத்தும் அனைத்து முக்கியத் தேர்வுகளிலும் படிப்படியாகக் கொண்டுவரப்பட உள்ளது. தேர்வு நடைமுறைகளை நவீனமயமாக்குவதன் மூலம், இந்தியாவின் மிக உயரிய தேர்வுகளின் தரத்தையும் வெளிப்படைத்தன்மையையும் உலகத்தரம் வாய்ந்ததாக மாற்ற யுபிஎஸ்சி திட்டமிட்டுள்ளது. இது நிர்வாக ரீதியிலான பணிகளை எளிதாக்குவதுடன், தேர்வு முடிவுகளை விரைவாகவும் துல்லியமாகவும் வெளியிடவும் உதவும்.