தமிழக மின்சார வாரியம் ரூ.2.47 லட்சம் கோடி கடனில் சிக்கியது எப்படி? வெள்ளை அறிக்கை வெளியிட்டார் அமைச்சர் நிர்மல் குமார்
செய்தி முன்னோட்டம்
தமிழகத்தில் புதிதாக ஆட்சிப் பொறுப்பேற்றுள்ள த.வெ.க. அரசு, மாநிலத்தின் நிதிநிலை குறித்த ஒட்டுமொத்த வெள்ளை அறிக்கையை வெளியிட்டதைத் தொடர்ந்து, தற்பொழுது பொதுத்துறை நிறுவனங்களிலேயே மிக அதிகக் கடனில் தத்தளிக்கும் மின்சார வாரியம் குறித்த பிரத்யேக வெள்ளை அறிக்கையை மின்துறை அமைச்சர் சி.டி.ஆர்.நிர்மல் குமார் இன்று அதிகாரப்பூர்வமாக வெளியிட்டுள்ளார். மின்சார வாரியத்தின் கடந்த 25 ஆண்டுகாலப் பாதை, நிதி இழப்புகள் மற்றும் காலிப் பணியிடங்கள் குறித்த அதிர வைக்கும் உண்மைகள் இந்த அறிக்கையில் இடம்பெற்றுள்ளன.
கடன்
மின்சார வாரியத்தின் கழுத்தை நெரிக்கும் ரூ.2.47 லட்சம் கோடி கடன்
சமீபத்தில் நிதியமைச்சர் வெளியிட்ட வெள்ளை அறிக்கையின்படி, தமிழ்நாட்டின் ஒட்டுமொத்தக் கடன் 13.18 லட்சம் கோடி ரூபாயாக உள்ள நிலையில், பொதுத்துறை நிறுவனங்களின் ஒட்டுமொத்தக் கடனான ரூ.3,18,176 கோடியில் மின்சாரத் துறையின் நிலுவை உள்கடன் மட்டும் 2.47 லட்சம் கோடி ரூபாயாக உயர்ந்து அதிர்ச்சியை ஏற்படுத்தியுள்ளது. அதாவது பொதுத்துறை நிறுவனங்களின் மொத்தக் கடனில் 77.6 விழுக்காடு மின்சார வாரியம் வாங்கிய கடனாக இருக்கும் சூழலில், கடந்த 2021 முதல் 2026 வரையிலான ஐந்து ஆண்டுகால திமுக ஆட்சியில் மட்டும் மின்வாரியத்தின் ஒட்டுமொத்த செலவு 5.32 லட்சம் கோடி ரூபாயாகவும், மொத்த வருமானம் 4.47 லட்சம் கோடி ரூபாயாகவும் இருந்ததால் அதன் நிகரப் பற்றாக்குறை 34,447 கோடி ரூபாயாக எகிறியுள்ளது.
மக்களுக்கு நிம்மதி
இந்த ஆண்டு மின் கட்டண உயர்வு இல்லை
மின்சார வாரியம் இவ்வளவு பிரம்மாண்ட நஷ்டத்திலும் நிதிப் பற்றாக்குறையிலும் இயங்கி வந்தாலும், புதிய தவெக அரசு சாமானிய மக்களின் நுகர்வோர் நலனைக் கருத்தில் கொண்டு, இந்த ஆண்டு தமிழ்நாட்டில் மின் கட்டண உயர்வு எதுவும் இருக்காது என்று மின்துறை அமைச்சர் சி.டி.ஆர்.நிர்மல் குமார் திட்டவட்டமாக அறிவித்துள்ளார். கடன் சுமையைக் காரணம் காட்டி மக்களின் தலையில் கூடுதல் பாரத்தை சுமத்த அரசு விரும்பவில்லை என்றும், நிர்வாகச் சீர்திருத்தங்கள் மூலமாகவே இந்த நிதி இழப்புகள் ஈடுகட்டப்படும் என்றும் அவர் தெளிவுபடுத்தியுள்ளார்.
மாதத்திற்கு ரூ.215 கோடி சேமிப்பு
மின் கொள்முதலில் நடக்கும் முறைகேடுகளுக்கு முற்றுப்புள்ளி
மின்சார வாரியத்தின் செலவினங்கள் தொடர்ந்து அதிகரித்து வந்த போதிலும், அதற்கேற்ப மின் கட்டமைப்புகள் பலப்படுத்தப்படாததற்கு முந்தைய ஆட்சியில் குறுகிய கால ஒப்பந்தங்கள் மூலம் தனியார் நிறுவனங்களிடமிருந்து அதிக விலைக்கு மின்சாரம் வாங்கப்பட்டதே காரணம் என்று அமைச்சர் சுட்டிக்காட்டினார். மேலும், இனிவரும் காலங்களில் இந்த முறைகேடுகளைத் தடுத்து மின்சாரத்தை நீண்ட கால ஒப்பந்தங்கள் மூலம் குறைந்த விலைக்கு வாங்கத் தற்போதைய அரசு தீவிர உத்திகளை வகுத்துள்ளதால் மின்சார வாரியத்திற்கு மாதத்திற்கு 215 கோடி ரூபாய் வரை மிச்சமாகும் என்று எதிர்பார்ப்பதாகக் குறிப்பிட்டுள்ளார்.
காலிப் பணியிடங்கள்
65,921 காலிப் பணியிடங்கள் நிலவினாலும் தடையற்ற சேவை
மின்சார வாரியத்தின் நிர்வாகச் சீர்கேடு குறித்துப் பேசிய அமைச்சர், ஒட்டுமொத்தமாக அனுமதிக்கப்பட்ட 1,40,635 பணியிடங்களில் தற்பொழுது 74,714 ஊழியர்கள் மட்டுமே பணியில் உள்ளதால் 65,921 பணியிடங்கள் காலியாகவே கிடக்கின்றன என்று கூறினார், கடந்த திமுக ஆட்சிக் காலத்தில் 9,136 ஊழியர்கள் ஓய்வு பெற்றும் வெறும் 343 பேருக்கு மட்டுமே புதிய பணி நியமனங்கள் வழங்கப்பட்டு வேலைவாய்ப்புகள் முடக்கப்பட்டுள்ளதாகவும், இவ்வளவு பெரிய பணியாளர்கள் பற்றாக்குறை நிலவினாலும் தற்போதைய ஊழியர்களின் அர்ப்பணிப்பால் மக்களுக்கு எந்தவிதத் தொய்வும் இன்றி மின் சேவைகள் தடையின்றி வழங்கப்பட்டு வருவதாகவும் தெரிவித்துள்ளார்.
ட்விட்டர் அஞ்சல்
Twitter Post
தமிழ்நாடு மின்சாரத் துறையின் வெள்ளை அறிக்கை வெளியிடு
— CTR.Nirmalkumar (@CTR_Nirmalkumar) June 25, 2026
மின்துறையின் வளர்ச்சி, வெளிப்படைத்தன்மை மற்றும் எதிர்கால முன்னேற்றத்திற்கான முக்கிய ஆவணமாக இவ்வெள்ளை அறிக்கை அமையும். pic.twitter.com/lSvUSjeXn8