27 பேரின் குடியுரிமையை பறித்த அசாம் தீர்ப்பாயங்களின் உத்தரவை ரத்து செய்த உச்ச நீதிமன்றம்!
செய்தி முன்னோட்டம்
ஒரு நபரின் குடியுரிமையைத் தீர்மானிக்கும் அல்லது ஒருவரை வெளிநாட்டினராக அறிவிக்கும் செயல்முறையானது முற்றிலும் நியாயமான முறையில் இருக்க வேண்டும் என்று இந்திய உச்ச நீதிமன்றம் வலியுறுத்தியுள்ளது. அசாமில் உள்ள வெளிநாட்டினர் தீர்ப்பாயங்களால் வெளிநாட்டினர் என்று அறிவிக்கப்பட்ட 27 நபர்களுக்கு இடைக்கால நிவாரணம் வழங்கிய நீதிபதிகள், அவர்களுக்கு எதிராகப் பிறப்பிக்கப்பட்டிருந்த உத்தரவுகளை ரத்து செய்து உத்தரவிட்டுள்ளனர்.
அரசின் கடமை
அரசின் கடமையும் நீதிமன்றத்தின் நியாயமும்
குடியுரிமை மற்றும் வெளிநாட்டினர் அந்தஸ்து என்பது மிக உயர்ந்த அரசியலமைப்பு மற்றும் சட்ட முக்கியத்துவம் வாய்ந்தது என்று நீதிமன்றம் தனது உத்தரவில் குறிப்பிட்டுள்ளது.
சட்டவிரோதமாக இந்தியக் குடியுரிமை கோருவதைத் தடுக்கும் கடமை அரசுக்கு உள்ளது என்பதை ஒப்புக்கொண்ட நீதிபதிகள், அதே நேரத்தில் அரசின் அந்த நடவடிக்கை நீதித்துறை நியாயத்திற்கு முரணாக அமைந்துவிடக் கூடாது என்றும் சுட்டிக்காட்டியுள்ளனர்.
நடவடிக்கைக்கு தடை
கட்டாய நடவடிக்கைகளுக்குத் தடை மற்றும் மறுவிசாரணை
கௌஹாத்தி உயர் நீதிமன்றம் மற்றும் வெளிநாட்டினர் தீர்ப்பாயங்கள் வழங்கிய முந்தைய தீர்ப்புகளை உச்ச நீதிமன்ற அமர்வு தற்பொழுது ரத்து செய்துள்ளது.
மேலும், இந்த 27 நபர்களுக்கு எதிராகத் தீர்ப்பாயங்கள் புதிய விசாரணையை நடத்தி முடிக்கும் வரை, அவர்கள் மீது நாடு கடத்துதல் போன்ற எந்தவொரு கட்டாய அல்லது கடுமையான சட்ட நடவடிக்கைகளையும் எடுக்கக் கூடாது என்றும் உத்தரவிடப்பட்டுள்ளது.
எனினும், இந்த உத்தரவு மனுதாரர்களின் குடியுரிமை தகுதியை உறுதிப்படுத்துவதாக அமையாது என்றும் நீதிமன்றம் தெளிவுபடுத்தியுள்ளது.
குடியுரிமை சிக்கல்
எழுத்துப் பிழைகளால் நேர்ந்த குடியுரிமை சிக்கல்
இந்த வழக்கில் மேல்முறையீடு செய்திருந்த சாபித்ரி டே, அஜ்பஹர் அலி, முகமது அக்பர் அலி உள்ளிட்டோர், தங்களது பழைய தேர்தல் வாக்காளர் பட்டியல்களில் இருந்த மிகச்சிறிய எழுத்துப் பிழைகள் மற்றும் தட்டச்சுத் தவறுகள் காரணமாகவே தங்களை வெளிநாட்டினராகத் தீர்ப்பாயங்கள் அறிவித்துவிட்டதாக வாதிட்டனர்.
இந்த மிக நுணுக்கமான தொழில்நுட்பக் காரணங்களின் அடிப்படையில் நிவாரணம் வழங்கிய நீதிபதிகள் விக்ரம் நாத் மற்றும் சந்தீப் மேத்தா அடங்கிய அமர்வு, ஆவணங்களை மறுபரிசீலனை செய்ய உத்தரவிட்டுள்ளது.
ஆவணங்கள்
1971க்கு முந்தைய ஆவணங்களை சமர்ப்பித்த மனுதாரர்கள்
மனுதாரர்கள் தங்களது இந்தியக் குடியுரிமையை நிரூபிப்பதற்காக 1971 ஆம் ஆண்டிற்கு முந்தைய மரபுவழி வம்சாவளித் தரவுகள், வாக்காளர் பட்டியல்கள் மற்றும் நிலப் பத்திரப் பதிவுகள் உள்ளிட்ட வரலாற்று ஆவணங்களைச் சமர்ப்பித்திருந்தனர்.
முன்னதாக, கடந்த ஜூன் மாதத்திலும் ஆவணப் குளறுபடிகளால் வெளிநாட்டினராக அறிவிக்கப்பட்ட ஐந்து பெண்களை நாடு கடத்துவதற்கு மற்றொரு உச்ச நீதிமன்ற அமர்வு இடைக்காலத் தடை விதித்து, மத்திய மற்றும் அசாம் அரசுகளுக்கு நோட்டீஸ் அனுப்பியிருந்தது குறிப்பிடத்தக்கது.