சென்னை கலாஷேத்ரா கல்லூரியில் மாணவிகளை விசாரிக்கும் மாநில மனித உரிமைகள் ஆணையம்
செய்தி முன்னோட்டம்
சென்னை கலாஷேத்ராவில் பாலியல் தொல்லை கொடுத்த பேராசிரியர்கள் ஹரி பத்மன், சஞ்சித்லால், சாய் கிருஷ்ணன், ஸ்ரீ நாத் ஆகியோரை பணி நீக்கம் செய்ய வேண்டும் என்று மாணவிகள் உள்ளிருப்பு போராட்டம் நடத்தினர்.
இதன் பின்னர் காவல்துறை, மாநில மகளிர் ஆணையம் ஆகியோர் விசாரணை நடத்தினார்கள்.
இதனையடுத்து மாணவிகள் குறிப்பிட்ட 4 பேர் மீது எழுத்துபூர்வமாக புகார் அளித்த நிலையில், பேராசிரியர் ஹரி பத்மன் போலீசாரால் கைது செய்யப்பட்டார்.
மற்ற 3 பேர் தற்காலிக ஆசிரியர்கள் என்பதால் பணி நீக்கம் செய்வதாக கல்லூரி நிர்வாகம் தெரிவித்தது.
இதனை தொடர்ந்து கல்லூரி மீண்டும் திறக்கப்பட்டு தேர்வுகள் நடந்து வருகிறது.
இந்நிலையில் இந்த விவகாரம் குறித்து மாநில மனித உரிமைகள் ஆணையம் தாமாக முன்வந்து விசாரணையினை மேற்கொண்டுள்ளது
வழக்கு நீர்த்துபோகக்கூடும்
2 டிஎஸ்பி.க்கள், பெண்காவல் ஆய்வாளர் உள்ளிட்ட 4 அதிகாரிகள் இந்த விசாரணையில் ஈடுபாடு
அதன்படி மனித உரிமைகள் ஆணையத்தின் புலனாய்வு பிரிவு ஐஜி., பாதிக்கப்பட்ட மாணவிகள் மற்றும் கல்லூரி நிர்வாகத்திடம் விரிவான விசாரணையினை நடத்தி 6 வாரத்தில் அறிக்கையளிக்குமாறு ஆணையம் உத்தரவிட்டுள்ளது.
இதனைதொடர்ந்து கலாஷேத்ராவில் மாணவிகளுக்கு நடந்த பாலியல்தொல்லை குறித்து கல்லூரியில் மனிதஉரிமைகள் ஆணைய அதிகாரிகள் இன்று(ஏப்ரல்.,11) நேரில் சென்று தங்கள் விசாரணையினை நடத்திவருகிறார்கள் என்று செய்திகள் வெளியாகியுள்ளது.
அதன்படி 2 டிஎஸ்பி.க்கள், பெண்காவல் ஆய்வாளர் உள்ளிட்ட 4 அதிகாரிகள் இந்த விசாரணையில் ஈடுபட்டுள்ளார்கள்.
இதற்கிடையே மாணவர்களுக்கு தேர்வுகள் நடைபெறுகிறது எனவே, விசாரணையினை வரும் 13ம்தேதி வைத்து கொள்ளுங்கள் என்று கலாஷேத்ரா நிர்வாகம் கேட்டுக்கொண்டதாக கூறப்படுகிறது.
அதற்கு அதிகாரிகள் தேர்வுகள் முடிந்தப்பின்னர் விசாரணை என்றால் இந்த வழக்கு நீர்த்துப்போகக்கூடும் என்று விளக்கமளித்து விசாரணையினை துவங்கியுள்ளார்கள் என்பது குறிப்பிடத்தக்கது.