சேது சமுத்திர திட்டம் - முதல்வர் மு.க.ஸ்டாலின் தீர்மானம் ஒருமனதாக நிறைவேற்றம்
சேது சமுத்திரதிட்டம் குறித்து சட்டப்பேரவையில் பேசிய தமிழக முதல்வர் மு.க.ஸ்டாலின், "தமிழகத்தின் பொருளாதார வளர்ச்சி மற்றும் இந்திய நாட்டின் பொருளாதார வளர்ச்சியை வலுபெறச்செய்ய மிக முக்கியமான திட்டமாக சேது சமுத்திர திட்டம் விளங்குகிறது" என்று கூறினார். 1860ம் ஆண்டு 50லட்சம் ரூபாயில் 'கமேண்டர் டைலர்' என்பவரால் உருவாக்கப்பட்ட மகத்தான திட்டம் தான் சேது சமுத்திர திட்டம் ஆகும். அதன்பின்னர் 1955ல் தமிழ்நாட்டின் சிறந்த நிபுணர் டாக்டர் ராமசாமி முதலியார் குழு துவங்கி, 1963,1964ல் என பல்வேறு பொறியியல் வல்லுநர்களால் பல்வேறு ஆண்டுகளாக ஆராய்ந்து இத்திட்டமானது வடிவமைக்கப்பட்டது. பின்னர் 2004ம்ஆண்டு ரூ.2,427கோடியில் இத்திட்டத்தை செயல்படுத்த அப்போதைய பிரதமர் மன்மோகன் சிங்'ஆல் அனுமதி வழங்கப்பட்டது. 2005ம்ஆண்டு துவங்கப்பட்டு இதன் பணிகள் நடந்துகொண்டிருக்கையில் இத்திட்டத்திற்கு தடை விதிக்கப்பட்டது.
மத்திய அரசு முன்வர கோரும் தமிழக அரசு - நிபந்தனைகளோடு தீர்மானத்திற்கு ஆதரவு தெரிவித்த கட்சியினர்
இதனை தொடர்ந்து, சேது சமுத்திர திட்டத்தை இனியும் நிறைவேற்றாமல் இருந்தால் தமிழகத்தின் முன்னேற்றம் மற்றும் வளர்ச்சிக்கு முட்டுக்கட்டை போடுவது போல் அமையும். எனவே, தாமதமின்றி சேது சமுத்திர திட்டத்தை நிறைவேற்ற, மத்திய அரசு முன்வரவேண்டும். இதனை முறையாக செயல்படுத்த தமிழக அரசு முழு ஒத்துழைப்பு அளிக்கும் என பேரவை ஒருமனதாக தீர்மானிக்கிறது என்று தமிழக முதல்வர் தெரிவித்தார். இதனை தொடர்ந்து, மீனவர்களின் கருத்துக்களை கேட்க வேண்டும் என்று அதிமுக'வும், திட்டத்தை மறுஆய்வு செய்யவேண்டும் என்று பாஜக'வும் நிபந்தனைகள் விதித்து தீர்மானத்திற்கு ஆதரவு தெரிவித்தது. இதற்கு பாஜக, காங்கிரஸ், விசிக போன்ற மற்ற கட்சிகளும் ஒப்புக்கொண்ட நிலையில், குரல் வாக்கெடுப்பு மூலம் தீர்மானம் ஒரு மனதாக நிறைவேற்றப்பட்டது என்று பேரவை தலைவர் அப்பாவு தெரிவித்தார்.
