சென்னை வடக்கு கடற்கரை பகுதியில் கஞ்சா விற்பனை - 5 பெண்கள் கைது
சென்னை பாரிமுனை வடக்கு கடற்கரை சாலை பகுதியில் கஞ்சா விற்பனை திருட்டுத்தனமாக நடந்து வருவதாக காவல்துறைக்கு தகவல் அளிக்கப்பட்டுள்ளது. அந்த தகவலின் பேரில், நேற்று(ஏப்ரல்.,27) ஆய்வாளர் ராஜா சிங், உதவி ஆய்வாளர் பிரேம் குமார் மற்றும் சில காவல்துறையினர் மாறுவேடத்தில் அப்பகுதியில் தங்கள் சோதனையினை தீவிரப்படுத்தி கண்காணித்து வந்தனர். அப்போது அங்கு சந்தேகப்படும் வகையில் 5 பெண்கள் சுற்றித்திரிந்ததை கண்ட காவல்துறையினர் அவர்களை அழைத்து விசாரணை செய்துள்ளார்கள். அப்போது அவர்கள் முன்னுக்கு பின் முரணாக பதில் அளித்த காரணத்தினால் காவல்துறையினர் அவர்களை காவல் நிலையத்திற்கு அழைத்து சென்றுள்ளார்கள். அங்கு வைத்து அவர்கள் வைத்திருந்த பையினை சோதனை செய்ததில் அதில் கஞ்சா இருப்பது தெரியவந்தது.
ஆந்திராவில் இருந்து கஞ்சா கடத்தப்பட்டு சென்னையில் விற்பனை
மேலும் தொடர்ந்த விசாரணையில் அவர்கள் மண்ணடி கிளைவ் பேக்டரி கோபால்நகரை சேர்ந்த ஸ்டெல்லா(49), பழைய வண்ணாரப்பேட்டை மாடல் லைன் பகுதியினை சேர்ந்த சவுந்தர்யா(23), மண்ணடி மூக்கர் நல்லமுத்து தெருவினை சேர்ந்த சங்கரி(22), ஜோதி(47), வடக்கு கடற்கரை சாலையினை சேர்ந்த கருப்பாயி(60) மற்றும் 16 வயது சிறுவன் ஒருவன் என்பது தெரியவந்துள்ளது. இவர்கள் கூட்டாக ஆந்திராவில் இருந்து கஞ்சா கடத்தி பாரிமுனையில் உள்ள வாடிக்கையாளர்களுக்கு விற்பனை செய்துள்ளார்கள். இந்நிலையில் இவர்களிடம் இருந்து ஒரு கிலோ கஞ்சா பறிமுதல் செய்யப்பட்டுள்ளது. இதனைதொடர்ந்து காவல்துறையினர் அந்த 5 பெண்களை கைதுச்செய்து ஜார்ஜ் டவுன் நீதிமன்றத்தில் ஆஜர்படுத்தி புழல் சிறையில் அடைத்துள்ளார்கள். இதில் முக்கிய குற்றவாளியாக கருதப்படும் வின்சென்ட் என்பவரை காவல்துறை தொடர்ந்து தேடி வருவது என்பது குறிப்பிடத்தக்கது.
