கடற்கரை பகுதியில் இரவுநேரத்தில் 12 மணிவரை இளைப்பாற அனுமதி வேண்டும் என கோரிக்கை
செய்தி முன்னோட்டம்
காரைக்கால் கடற்கரை பகுதியில் பொதுமக்கள் இளைப்பாற இரவு நேரம் 12 மணிவரை அனுமதி வழங்கவேண்டும் என்று சுற்றுலா பயணிகள் கோரிக்கை வைத்துள்ளார்கள்.
தற்போது கோடைக்காலம் துவங்கியுள்ள நிலையில் காரைக்கால் கடற்கரை பகுதியில் உள்ளூர் மற்றும் வெளியூரிலிருந்து பொதுமக்கள் கூட்டம் அதிகரித்துவருகிறது.
கோடை வெயிலின் தாக்கத்தினை குறைத்துக்கொள்ள மக்கள் இங்குவரும் நிலையில், காரைக்காலில் பொழுதுபோக்கும் இடமாக இந்த கடற்கரை ஒன்றே இருப்பதாலும் இங்கு கூட்டம் படையெடுக்கிறது.
இங்கு வருவோரில் சிலர் இரவுநேர உணவினை முடித்துவிட்டு சற்று இளைப்பாற வருகிறார்கள்.
நடைப்பயிற்சி மேற்கொள்ளவும் இங்கு கூட்டம் தற்போதைய காலகட்டத்தில் அதிகரித்து காணப்படுகிறது.
இந்நிலையில் இப்பகுதியிலுள்ள கடலோர காவல்துறையினர் இரவு 10.30 மணிக்கு சரியாக வந்து, அங்குள்ள பொதுமக்களை கடற்கரையினை விட்டு வெளியேற வற்புறுத்துகிறார்கள் என்று கூறப்படுகிறது.
கோரிக்கை
தேங்கும் குப்பைகளை தினந்தோறும் சுத்தம் செய்திட வேண்டும்
இது அங்கு நேரத்தை பொழுதுபோக்க வருவோருக்கு இடையூறாக உள்ளது என்பதால் கோடை விடுமுறை முடியும் வரை கடற்கரை பகுதியில் இரவு 12 மணி வரை குடும்பத்துடன் பொதுமக்கள் தங்கள் கோடை கால விடுமுறையினை கழிக்க மாவட்ட நிர்வாகம் அனுமதி வழங்க வேண்டும் என்று சமூக ஆர்வலர்கள் மற்றும் பொதுமக்கள் கோரிக்கை விடுத்துள்ளார்கள்.
இதுகுறித்து சமூக ஆர்வலர் இராஜா முகமது என்பவர் கூறுகையில், இரவு 12 மணிவரை கடற்கரையில் பொதுமக்கள் இளைப்பாற அனுமதி வழங்கப்படுவதோடு, காவல்துறையினரின் பாதுகாப்பும் கொடுக்கப்பட வேண்டும்.
மேலும் கடற்கரையில் தேங்கும் குப்பைகளை தினந்தோறும் சுத்தம் செய்து பொதுமக்களுக்கு ஏற்படும் சுகாதார சீர்கேட்டினை சரி செய்ய நடவடிக்கை மேற்கொள்ள வேண்டும் என மாவட்ட நிர்வாகத்திற்கு கோரிக்கை வைத்துள்ளார்.