புதுச்சேரியில் துப்புரவு பணியாளர்களுக்கு ஸ்டார் ஹோட்டலில் ட்ரீட் கொடுத்த எம்.எல்.ஏ.
புதுச்சேரி முதலியார்பேட்டை தொகுதி திமுக எம்.எல்.ஏ.சம்பத் தனது பிறந்த நாளினையொட்டி தனது தொகுதியில் உள்ள அனைத்து தூய்மை பணியாளர்களுக்கும் ஸ்டார் ஹோட்டலில் விருந்து அளித்துள்ளார். இந்த விருந்தானது எது தேவையோ அதனை எவ்வளவு வேண்டுமானாலும் வாங்கி சாப்பிட கூடிய Buffet முறையில் இருந்ததாக தகவல்கள் தெரிவிக்கிறது. விருந்தினை கொடுத்தது மட்டுமல்லாமல் பெண் துப்புரவு ஊழியர்களுக்கு புதுச்சேரி திமுக எம்.எல்.ஏ. சம்பத் அவர்கள் ஆளுக்கொரு புடவையையும் அளித்துள்ளார். மேலும் சம்பத் அவர்கள் தூய்மை பணியாளர்களுக்கு ஸ்டார் ஹோட்டலில் விருந்தினை அவரே தனது கைகளால் பரிமாறியும் உள்ளார்.
இதுபோன்ற ஹோட்டல்களை வெளியில் இருந்து தான் பார்த்துள்ளோம் - துப்புரவு பணியாளர்கள்
இதனை தொடர்ந்து புதுச்சேரி திமுக எம்.எல்.ஏ. சம்பத் விருந்து பரிமாறிய கையோடு தானும் ஒரு தட்டில் சாப்பாடு போட்டுகொண்டு போய் அவர்கள் மத்தியில் அமர்ந்து சாப்பிட்டுள்ளார். அதே போல் விருந்து முடிந்த பின்னர் அவர் தூய்மை பணியாளர்கள் அனைவரையும் உடனிருந்து வழியனுப்பியுள்ளார். இவரது இந்த உபசரணையில் மயங்கிப்போன துப்புரவு பணியாளர்கள் அவரை வாழ்த்தியபடி மன நிறைவோடு அங்கிருந்து கிளம்பி சென்றுள்ளார்கள். இதற்கிடையே இந்த அனுபவம் குறித்து துப்புரவு பணியாளர்கள், நாங்கள் பெற்ற பிள்ளைகள் கூட எங்களை இது போன்ற இடங்களுக்கு அழைத்து வந்ததில்லை. இந்த ஹோட்டலை எல்லாம் நாங்கள் வெளியில் இருந்து தான் பார்த்திருக்கிறோம் என்று மகிழ்ச்சியோடு கூறியது குறிப்பிடத்தக்கது.
