ஆபரேஷன் சிந்தூர் ரகசியம்: இந்தியாவிற்குள் ஸ்லீப்பர் செல்களை இறக்கிய பாகிஸ்தான்; ஓய்வுபெற்ற ஏர் மார்ஷல் தகவல்
செய்தி முன்னோட்டம்
பஹல்காம் பயங்கரவாதத் தாக்குதலுக்கு பதிலடியாக மே 2025ல் இந்தியா நடத்திய ஆபரேஷன் சிந்தூர் மோதலின் போது, ரஷ்யாவின் S-400 வான் பாதுகாப்பு அமைப்புகள் இருக்கும் இடத்தைக் கண்டுபிடிக்கப் பாகிஸ்தான் தீவிரமாக முயன்றதாக ஓய்வுபெற்ற ஏர் மார்ஷல் ஜிதேந்திர மிஸ்ரா வெளிப்படுத்தியுள்ளார். இதற்காக இந்தியாவிற்குள் இருந்த உளவு அமைப்புகளையும், தூங்கும் நிலையில் இருந்த ஸ்லீப்பர் செல்களையும் பாகிஸ்தான் இயக்கியதாக அவர் தெரிவித்துள்ளார். S-400 அச்சத்தால் பாகிஸ்தான் போர் விமானங்கள் இந்திய எல்லைக்கு 200 கிமீ தூரத்திற்குள் கூட வர முடியாமல் தவித்தன.
பாகிஸ்தான் கண்காணிப்பு விமானம்
314 கிமீ தூரத்தில் சுட்டு வீழ்த்தப்பட்ட பாகிஸ்தானின் ஏவாக்ஸ் விமானம்!
இந்தியாவின் ரேடார் தாக்குதலால் பாகிஸ்தானின் தரைவழி கட்டுப்பாட்டு மையங்கள் அழிக்கப்பட்டதை அடுத்து, அவை வான்வழி எச்சரிக்கை அமைப்பான 'ஏவாக்ஸ்' (AWACS) விமானங்களை சார்ந்திருக்க வேண்டிய நிலை ஏற்பட்டது.
அப்பொழுது சர்கோதாவிலிருந்து பறந்த பாகிஸ்தானின் ஏவாக்ஸ் விமானத்தை, இந்திய எல்லைக்குட்பட்ட பகுதியிலிருந்து S-400 ஏவுகணை மூலம் 314 கிமீ தொலைவிலேயே சுட்டு வீழ்த்தி இந்திய விமானப்படை சாதனை படைத்தது.
ராணுவ வரலாற்றிலேயே தரைப்பகுதியில் இருந்து மிக நீண்ட தூரத்திலுள்ள இலக்கைத் தாக்கிய நிகழ்வாக இது பதிவானது.
இந்திய படைகளுக்கு சுதந்திரம்
முழு சுதந்திரத்துடன் செயல்பட்ட இந்திய முப்படைகள்
பயங்கரவாத முகாம்களை மட்டுமே அழிக்க வேண்டும் என்றும், பொதுமக்கள் மற்றும் வழிபாட்டுத் தலங்களுக்கு எந்தப் பாதிப்பும் வரக்கூடாது என்றும் மத்திய அரசு துல்லியமான வழிகாட்டுதல்களை வழங்கியதாக ஏர் மார்ஷல் கூறினார்.
அதேவேளையில் ராணுவத்திற்கு முழு செயல்பாட்டு சுதந்திரம் அளிக்கப்பட்டிருந்தது.
மே 7 அன்று பயங்கரவாத முகாம்கள் மீது இந்தியா நடத்திய தாக்குதலுக்குப் பிறகு, பாகிஸ்தான் மீண்டும் ஏவுகணைகள் மற்றும் ட்ரோன்களை அனுப்பி நிலைமையை மோசமாக்கியதால், இந்தியா அதன் 11 முக்கிய ராணுவ மையங்களைத் தாக்கிப் பாகிஸ்தானைப் பணிய வைத்தது.
பெண் போர் விமானிகள்
தாக்குதலில் முத்திரை பதித்த இந்திய பெண் போர் விமானிகள்
ஆபரேஷன் சிந்தூர் நடவடிக்கையில் இந்தியப் பெண் போர் விமானிகள் மிக முக்கியமான பங்காற்றியதாகக் குறிப்பிடப்பட்டுள்ளது.
அவர்கள் லஷ்கர்-இ-தொய்பா அமைப்பின் முரிட்கே தலைமையகத்தைத் தாக்கியதுடன், ஒரே நாளில் பல போர் மொபிலிட்டி பணிகளில் ஈடுபட்டுப் பாகிஸ்தானின் வான்படைத் தளங்கள் மற்றும் கட்டுப்பாட்டு மையங்களைத் துல்லியமாகத் தாக்கி அழித்தனர்.
மே 10 அன்று இந்தியாவின் கடுமையான தாக்குதலைத் தொடர்ந்து, பாகிஸ்தான் உடனடியாகப் போர்நிறுத்தத்தைக் கோரிப் போரை முடிவுக்குக் கொண்டுவந்தது.