ஊழியர் தற்கொலை வழக்கில் ஓலா எலக்ட்ரிக் சிஇஓ மற்றும் மூத்த அதிகாரி மீது வழக்கு பதிவு
செய்தி முன்னோட்டம்
ஓலா எலக்ட்ரிக் நிறுவனத்தின் தலைமைச் செயல் அதிகாரி பவிஷ் அகர்வால் மற்றும் மூத்த அதிகாரி சுப்ரதா குமார் தாஸ் ஆகியோர் மீது, நிறுவனத்தின் ஊழியர் தற்கொலை செய்து கொண்ட வழக்கில், தற்கொலைக்குத் தூண்டியதாகப் பெங்களூரில் எஃப்ஐஆர் பதிவு செய்யப்பட்டுள்ளது. அக்டோபர் 6 ஆம் தேதி பதிவு செய்யப்பட்ட இந்த எஃப்ஐஆர் இப்போது வெளிச்சத்துக்கு வந்துள்ளது. கே.அரவிந்த் என்ற நிறுவனத்தின் ஹோமோலோகேஷன் இன்ஜினியர், செப்டம்பர் 28 அன்று விஷம் அருந்தி தற்கொலை செய்து கொண்டதாகக் கூறப்படுகிறது. அரவிந்த் இறந்த இரண்டு நாட்களுக்குப் பிறகு அவரது வங்கிக் கணக்கிற்கு ₹17.46 லட்சம் தொகை மாற்றப்பட்டதால் சந்தேகம் எழுந்தது. அதிகாரிகள் மேற்கொண்ட விசாரணையில், அரவிந்தின் அறையில் இருந்து 28 பக்கங்கள் கொண்ட தற்கொலைக் கடிதம் கைப்பற்றப்பட்டது.
வேலைப்பளு
வேலைப்பளுவால் மன உளைச்சல்
அந்தக் கடிதத்தில், அதீத வேலைப்பளு, மன உளைச்சல் மற்றும் நிலுவைத் தொகையை வழங்காதது ஆகிய காரணங்களுக்காகச் சுப்ரதா குமார் தாஸ் மற்றும் பவிஷ் அகர்வால் ஆகியோரைக் குற்றம் சாட்டியதாகத் தெரிகிறது. இந்தக் கடிதத்தின் அடிப்படையில், அரவிந்தின் குடும்பத்தினர் அளித்த புகாரின் பேரில், சுப்ரமண்யபுரா காவல் நிலையத்தில் பிஎன்எஸ்எஸ் பிரிவு 108 உடன் 3(5) இன் கீழ் வழக்குப்பதிவு செய்யப்பட்டு, அதிகாரிகள் மற்றும் ஓலா எலக்ட்ரிக் நிறுவனம் மீது வழக்குப் பதிவு செய்யப்பட்டுள்ளது. இதற்குப் பதிலளித்த ஓலா எலக்ட்ரிக் நிறுவனம், அரவிந்தின் மறைவு குறித்து ஆழ்ந்த வருத்தம் தெரிவித்ததுடன், அவர் பணியில் இருந்தபோது எந்தக் குறையையும் எழுப்பவில்லை என்றும், உயர் அதிகாரிகளுடன் அவருக்கு நேரடித் தொடர்பு இல்லை என்றும் கூறியது.