'லடாக் இந்தியாவின் ஒருங்கிணைந்த பகுதி': சீனாவின் எதிர்ப்பை சற்றும் பொருட்படுத்தாமல் இந்தியா பதில்
செய்தி முன்னோட்டம்
லடாக்கில் உள்ள 28 உத்தேச மற்றும் மூலோபாய முக்கியத்துவம் வாய்ந்த இடங்களுக்கு அதிகாரப்பூர்வமான பெயர்களைச் சூட்டி, சர்வே ஆஃப் இந்தியா வரைபடத்தில் முறைப்படுத்திய மத்திய அரசின் முடிவை சீனா எதிர்க்கும் நிலையில், வெளியுறவுத்துறை அமைச்சகம் அதற்கு கடுமையான கண்டனத்தையும் மறுப்பையும் தெரிவித்துள்ளது. லடாக் விவகாரத்தில் இந்தியா எடுத்துள்ள இந்த நடவடிக்கைக்கு சீனா கடும் எதிர்ப்பு தெரிவித்துள்ளது. இதுகுறித்துச் சீன வெளியுறவுத்துறை அமைச்சகத்தின் செய்தித் தொடர்பாளர் கூறுகையில், "இந்தியா தன்னிச்சையாகவும் சட்டவிரோதமாகவும் உருவாக்கியுள்ள 'லடாக் யூனியன் பிரதேசம்' என்ற கருத்தை சீனா எப்போதுமே அங்கீகரித்தது கிடையாது. இந்தியாவின் இந்த நடவடிக்கை சட்டவிரோதமானது, மேலும் இந்தியா-சீனா எல்லைப் பகுதியின் மேற்குப் பகுதி எப்போதுமே சீனாவுக்குச் சொந்தமானது என்ற உண்மையை இது மாற்ற முடியாது" எனத் தெரிவித்துருந்தார்.
வெளியுறவுத்துறை
வெளியுறவுத்துறை அமைச்சகத்தின் (MEA) பதில்
சீனாவின் இந்தத் தர்க்கத்திற்கு பதிலடி கொடுக்கும் வகையில், வெளியுறவுத்துறை அமைச்சகத்தின் அதிகாரப்பூர்வ செய்தித் தொடர்பாளர் ரந்தீர் ஜெய்ஸ்வால் செய்தியாளர்களை சந்தித்து பேசுகையில், "லடாக் யூனியன் பிரதேசம் என்பது எப்போதுமே இந்தியாவின் ஒரு ஒருங்கிணைந்த மற்றும் பிரிக்க முடியாத பகுதியாகும். சீனாவின் எந்தவொரு மறுப்பும் அல்லது எதிர்ப்பும் இந்த நிலைநிறுத்தப்பட்ட உண்மையை ஒருபோதும் மாற்ற முடியாது" என்று திட்டவட்டமாகக் குறிப்பிட்டார்.
அதிகாரப்பூர்வ வரைபடங்களில் இந்த இடங்களை அடையாளம் கண்டு பெயரிட்டது முழுக்க முழுக்க உள்ளூர் பங்குதாரர்களின் ஆலோசனையின் பேரில்தான் மேற்கொள்ளப்பட்டது என்றும், பொதுமக்களிடையே விழிப்புணர்வை ஏற்படுத்தவும், துல்லியமான அங்கீகாரத்தை வழங்கவுமே இந்த நடவடிக்கை எடுக்கப்பட்டதாக அவர் விளக்கினார்.