மதுரை மீனாட்சி - சுந்தரேஸ்வரர் திருக்கல்யாணம் இன்று; பெண்கள் தாலி கயிறு மாற்ற உகந்த நேரம் எது?
செய்தி முன்னோட்டம்
உலகப் புகழ்பெற்ற மதுரை சித்திரைத் திருவிழாவின் சிகர நிகழ்வான மீனாட்சி அம்மன் - சுந்தரேஸ்வரர் திருக்கல்யாண வைபவம் இன்று கோலாகலமாக நடைபெறுகிறது. இதையொட்டி மதுரையே விழாக்கோலம் பூண்டுள்ளது. ஏப்ரல் 19-ஆம் தேதி கொடியேற்றத்துடன் தொடங்கிய இந்தத் திருவிழாவின் 10-வது நாளான இன்று, மீனாட்சி அம்மனுக்கும் சுந்தரேஸ்வரருக்கும் மங்கல நாண் சூட்டும் நிகழ்வு நடைபெறுகிறது. இன்று காலை 8.35 மணி முதல் 8.59 மணி வரை திருக்கல்யாண வைபவம் நடைபெறும். சுமார் 10 டன் எடையுள்ள, ரூ.30 லட்சம் மதிப்பிலான பல வண்ணப்பூக்களால் திருமண மேடை பிரம்மாண்டமாக அலங்கரிக்கப்பட்டுள்ளது. தங்கை மீனாட்சியைத் தாரை வார்த்துக் கொடுக்க திருப்பரங்குன்றத்தில் இருந்து பவளக்கனிவாய் பெருமாளும், தெய்வானையுடன் முருகப்பெருமானும் நேற்று இரவே மீனாட்சி அம்மன் கோயிலுக்கு எழுந்தருளியுள்ளனர்.
தாலி கயிறு
பெண்கள் தாலி கயிறு மாற்ற உகந்த நேரம்
மதுரை மீனாட்சி அம்மன் திருக்கல்யாணத்தின் போது, சுமங்கலிப் பெண்கள் தங்கள் தாலி கயிறைப் புதுப்பித்துக் கொள்வது நீண்டகால மரபாகும். திருக்கல்யாணம் நடைபெறும் அதே நேரமான காலை 8.35 மணி முதல் 8.59 மணி வரை தாலி கயிறு மாற்றிக் கொள்ளலாம். அந்த நேரத்தில் மாற்ற இயலாதவர்கள், காலை 10.35 மணி முதல் 11.30 மணி வரை உள்ள நல்ல நேரத்தில் தாலி கயிறைப் புதுப்பித்துக் கொள்ளலாம்.
ஏற்பாடுகள்
பாதுகாப்பு மற்றும் ஏற்பாடுகள்
லட்சக்கணக்கான பக்தர்கள் குவிந்து வருவதால், 20-க்கும் மேற்பட்ட இடங்களில் எல்இடி (LED) திரைகள் அமைக்கப்பட்டு நேரடி ஒளிபரப்பு செய்யப்படுகிறது. காவல் ஆணையர் அபிஷேக் தீக்ஷித் தலைமையில் 2,500-க்கும் மேற்பட்ட போலீசார் பாதுகாப்புப் பணியில் ஈடுபட்டுள்ளனர். திருக்கல்யாணத்தையொட்டி சுமார் 1.5 லட்சம் பேருக்கு பிரம்மாண்ட விருந்து உபசரிக்கத் திட்டமிடப்பட்டுள்ளது.
நிகழ்வுகள்
அடுத்தடுத்த நிகழ்வுகள்
சித்திரைத் திருவிழாவின் அடுத்த முக்கிய நிகழ்வான தேரோட்டம் நாளை (ஏப்ரல் 29) நடைபெற உள்ளது. அதனைத் தொடர்ந்து, கள்ளழகர் வைகை ஆற்றில் எழுந்தருளும் வைபவம் மே 1-ஆம் தேதி அதிகாலை நடைபெறுகிறது. தற்போது இந்தியாவில் நிலவும் வெப்ப அலையையும் பொருட்படுத்தாமல், பக்தியில் திளைத்துள்ள மதுரை மக்களின் உற்சாகம், இத்திருவிழாவின் சமூக மற்றும் கலாச்சார முக்கியத்துவத்தை உலகிற்குப் பறைசாற்றுகிறது.