சென்னையில் 65 வழித்தடங்களில் மட்டுமே தாழ்த்தள பேருந்துகள் இயக்க வாய்ப்பு - தமிழக அரசு
தமிழ்நாடு போக்குவரத்து கழகங்களுக்காக 1,107பேருந்துகள் கொள்முதல் செய்யும் டெண்டர் அறிவிக்கப்பட்டது. இதில் மாற்றுத்திறனாளிகளுக்கான தாழ்த்தள பேருந்துகளையும் கொள்முதல் செய்ய உத்தரவிடகோரி வைஷ்ணவி ஜெயக்குமார் என்பவர் வழக்கு தொடர்ந்தார். இந்த வழக்கு விசாரணைக்கு வந்தபொழுது, எந்தெந்த வழித்தடங்களில் தாழ்த்தள பேருந்துகளை இயக்குவதற்கான சாத்தியக்கூறுகள் உள்ளது என்பதை அறிக்கையாக தாக்கல் செய்ய கோரி தமிழக அரசுக்கு சென்னை உயர்நீதிமன்றம் உத்தரவிட்டிருந்தது. இந்நிலையில் இந்த வழக்கு இன்று மீண்டும் விசாரணைக்கு வந்தது. அப்போது, சென்னை மாநகர போக்குவரத்து கழகம் சார்பில் அறிக்கை தாக்கல் செய்யப்பட்டது. அதில், சென்னை போக்குவரத்து கழகம் சார்பில் 130கிராம வழித்தடங்களில் பேருந்துகள் இயங்குகிறது. அந்த சாலைகள் குறுகலாக இருக்கும் காரணத்தினால் தாழ்த்தள பேருந்துகளை அப்பகுதியில் இயக்கினால் பேருந்துகள் கடுமையாக சேதமடையும் என்று கூறப்பட்டிருந்தது.
தாழ்தள பேருந்துகள் இயக்க முடியாத வழித்தடங்களில் ஆய்வு செய்து அறிக்கை தாக்கல் செய்ய உத்தரவு
இதனை தொடர்ந்து, சென்னை சுரங்கப்பாதை வழியாக 173 வழித்தடங்களில் தாழ்த்தள பேருந்துகளை இயக்கினால் மழை காலங்களில் போக்குவரத்து பாதிப்பு ஏற்படக்கூடும். இதே போல் மினி பேருந்துகள் இயங்கும் 74 தடங்களிலும், மெட்ரோ பணிகள் நடக்கும் 186 வழித்தடங்களிலும் தாழ்தள பேருந்துகளை இயக்குவது சாத்தியமில்லை. இதனால் 342 தாழ்தள பேருந்துகள் வாங்க திட்டமிடப்பட்டிருந்த நிலையில் அவற்றை தோராயமாக 65 வழித்தடங்களில் இயக்க திட்டமிடப்பட்டுள்ளது என்றும் அந்த அறிக்கையில் கூறப்பட்டுள்ளது. இதையடுத்து வழக்கை விசாரித்த நீதிபதிகள் தாழ்தள பேருந்துகள் இயக்க முடியாத வழித்தடங்களில் மனுதாரர்கள் தரப்பு உள்ளிட்டோரை இணைத்து ஆய்வு நடத்தி அறிக்கை தாக்கல் செய்ய உத்தரவிட்டது. மேலும் இந்த வழக்கு விசாரணை பிப்ரவரி 20ம் தேதிக்கு ஒத்திவைக்கப்பட்டது குறிப்பிடத்தக்கது.
