கர்நாடகா முதல்வராகிறார் சித்தராமையா - காங்கிரஸ் தலைமை முடிவு
செய்தி முன்னோட்டம்
கர்நாடகா சட்டசபை தேர்தல் நடந்து முடிந்து, அதில் 135 இடங்களை காங்கிரஸ் கைப்பற்றி ஆட்சியினை பிடித்தது.
எனினும், முதல்வர் பதவியினை ஏற்கப்போவது யார்? என்னும் கேள்வி தொடர்ந்து எழுந்து கொண்டே இருந்தது.
முதல்வர் பதவிக்கு டி.கே.சிவகுமாருக்கும், சித்தராமையாவுக்கும் கடும் போட்டி நிலவியது.
இதனையடுத்து ராகுல் காந்தி மற்றும் சோனியா காந்தியுடன் காங்கிரஸ் தேசிய தலைவரான மல்லிகார்ஜுன கார்கே ஆலோசனை நடத்தினார்.
பின்னர் சித்தராமையா மற்றும் டி.கே.சிவகுமார் ஆகியோர் மத்தியில் தனித்தனியாக ஆலோசனை மேற்கொண்டார்.
அவர்கள் இருவரிடமும் பல்வேறு திட்டங்களை அவர் கூறியுள்ளார்.
முதல் 2 ஆண்டுகள் ஒருவரும், மீதமுள்ள 3 ஆண்டுகள் ஒருவரும் பதவி வகிக்கும் வண்ணம் செயல்படலாம் என்று அவர் கூறியதற்கு 2 பேருமே மறுப்பு தெரிவித்துள்ளார்கள்.
காங்கிரஸ்
முதல்வர் பதவி குறித்து கட்சி மேலிடம் முடிவு
இதனைத்தொடர்ந்து மல்லிகார்ஜுன கார்கே,மீண்டும் முன்னாள் காங்கிரஸ் தலைவர் சோனியா காந்தியிடம் நேற்று இரவு காணொளி காட்சிமூலம் ஆலோசனை மேற்கொண்டுள்ளார்.
அப்போது எடுக்கப்பட்ட முடிவு குறித்து கே.சி.வேணுகோபால், ரன்தீப்சூர்ஜேவாலா ஆகியோர் சித்தராமையா மற்றும் டி.கே.சிவகுமார் ஆகியோரிடம் கட்சி தலைமை எடுத்துள்ள முடிவு குறித்து எடுத்துரைத்துள்ளார்கள்.
அதன்படி, கர்நாடகா முதல்வராக சித்தராமையாவும், துணை முதல்வராக டி.கே.சிவகுமாரையும் நியமிக்க முடிவு செய்யப்பட்டுள்ளது என்று தெரிவித்துள்ளனர்.
தொடர்ந்து, முதல்வர், துணைமுதல்வர் மற்றும் புதிய எம்.எல்.ஏ.க்களுக்கான பதவியேற்பு விழாவானது வரும் 20ம்தேதி நடைபெறவுள்ளது என்றும் கூறப்பட்டுள்ளது.
இதுகுறித்து டி.கே.சிவகுமார் செய்தியாளர்களுக்கு பேட்டியளிக்கையில், யார் முதல்வர், துணை முதல்வர் என்பதனை கட்சி மேலிடம் முடிவுசெய்துள்ளது.
காங்கிரஸ் நலனுக்காக சித்தராமையா முதல்வராவதில் என்ன தவறு.
நான் கட்சிக்காக தியாகம் செய்துவிட்டேன் என்று கூறியுள்ளார்.