WFH: பிரதமரின் கோரிக்கையை நிறுவனங்கள் நிராகரிக்க முடியுமா? ஊழியர்களுக்கு உள்ள உரிமைகள் என்ன?
செய்தி முன்னோட்டம்
பெட்ரோல், டீசல் விலையேற்றம் மற்றும் அந்நியச் செலாவணி நெருக்கடியைச் சமாளிக்க 'வீட்டிலிருந்தே வேலை' (WFH) முறையை மீண்டும் தொடங்குமாறு பிரதமர் நரேந்திர மோடி விடுத்த கோரிக்கை, இந்திய கார்ப்பரேட் உலகில் புதிய சட்ட விவாதத்தைக் கிளப்பியுள்ளது. பிரதமரே பொதுவெளியில் கோரிக்கை விடுத்த பிறகும், ஒரு நிறுவனம் தனது ஊழியர்களை அலுவலகத்திற்கு வருமாறு கட்டாயப்படுத்த முடியுமா? என்ற கேள்வி எழுந்துள்ளது. இந்தியத் தொழிலாளர் சட்டங்களின்படி, வீட்டிலிருந்தே வேலை செய்வது என்பது ஊழியர்களின் சட்டப்பூர்வமான உரிமை அல்ல. இது முற்றிலும் நிறுவனம் மற்றும் ஊழியர்களுக்கு இடையிலான வேலை ஒப்பந்தத்தைப் (Employment Contract) பொறுத்தது. "பிரதமரின் வேண்டுகோள் என்பது ஒரு கொள்கை ரீதியான ஆலோசனை மட்டுமே; அது சட்டப்பூர்வமான உத்தரவு அல்ல" எனச் சட்ட வல்லுநர்கள் தெளிவுபடுத்துகின்றனர்.
அதிகாரம்
நிறுவனங்களின் அதிகாரம்
தற்போதைய சூழலில், ஒரு நிறுவனம் தனது ஊழியர்களை அலுவலகத்திற்கு வருமாறு பணிப்பதற்கான முழு அதிகாரத்தைக் கொண்டுள்ளது. பணிபுரியும் இடம், நேரம் மற்றும் வருகைப்பதிவு தொடர்பான முடிவுகளை எடுக்கும் உரிமை நிர்வாகத்திற்கு உண்டு. கொரோனா காலத்தில் பேரிடர் மேலாண்மைச் சட்டத்தின் (Disaster Management Act) கீழ் பிறப்பிக்கப்பட்ட கட்டாய உத்தரவுகள் இப்போது அமலில் இல்லாததால், நிறுவனங்கள் தங்களது விருப்பப்படி 'ஹைப்ரிட்' அல்லது முழுமையான அலுவலகப் பணி முறையைச் செயல்படுத்தலாம்.
கோரிக்கை
IT நிறுவனங்களின் கோரிக்கை
பிரதமரின் வேண்டுகோளை ஏற்று, ஐடி மற்றும் ஐடி சார்ந்த நிறுவனங்களுக்கு (IT/ITES) 'வீட்டிலிருந்தே வேலை' முறையைக் கட்டாயமாக்க வேண்டும் என ஐடி ஊழியர் சங்கமான NITES, மத்திய தொழிலாளர் நல அமைச்சகத்திற்கு கடிதம் எழுதியுள்ளது. எரிபொருள் சிக்கனம் மற்றும் போக்குவரத்து நெரிசலைக் குறைக்க இதுவே சரியான தருணம் என அவர்கள் வாதிடுகின்றனர். அரசாங்கம் முறையான அரசாணையை (Government Notification) வெளியிடும் வரை, வீட்டிலிருந்தே வேலை செய்யும் முறையைச் செயல்படுத்துவது என்பது அந்தந்த நிறுவனங்களின் தனிப்பட்ட முடிவாகவே இருக்கும். ஆனால், பிரதமரின் இந்த வேண்டுகோள் ஊழியர்களிடையே பெரும் எதிர்பார்ப்பை ஏற்படுத்தியுள்ளதால், வரும் நாட்களில் நிறுவனங்கள் தங்கள் கொள்கைகளில் நெகிழ்வுத்தன்மையைக் கொண்டுவர வாய்ப்புள்ளது.