முன்னாள் ராணுவ வீரரை மிரட்டி ₹98 லட்சம் அபேஸ்; அதிரவைக்கும் டிஜிட்டல் மோசடி; ஹிமாச்சல பிரதேசத்தில் அதிர்ச்சி
செய்தி முன்னோட்டம்
ஹிமாச்சல பிரதேசத்தைச் சேர்ந்த முன்னாள் ராணுவ வீரர் ஒருவர், நூதனமான டிஜிட்டல் அரெஸ்ட் மோசடியில் சிக்கி தனது வாழ்நாள் சேமிப்பான ₹98 லட்சத்தை இழந்துள்ள சம்பவம் பெரும் பரபரப்பை ஏற்படுத்தியுள்ளது. போதைப்பொருள் கடத்தல் வழக்கில் தொடர்புடையதாக மிரட்டி, சைபர் குற்றவாளிகள் அவரிடமிருந்து இந்தப் பெருந்தொகையைப் பறித்துள்ளனர். பாதிக்கப்பட்ட முன்னாள் ராணுவ வீரருக்கு வந்த ஒரு தொலைபேசி அழைப்பில், அவர் பெயரில் வந்த பார்சல் ஒன்றில் சட்டவிரோத போதைப்பொருட்கள் மற்றும் போலி பாஸ்போர்ட்டுகள் இருப்பதாகக் கூறப்பட்டுள்ளது. தொடர்ந்து, தங்களை சிபிஐ மற்றும் மும்பை காவல்துறையினர் என்று அடையாளப்படுத்திக் கொண்ட மோசடி கும்பல், அவரிடம் வீடியோ அழைப்பு மூலம் விசாரணை நடத்தியுள்ளனர்.
சோகம்
வாழ்நாள் சேமிப்பை இழந்த சோகம்
அவர் எங்கும் தப்பிச் செல்லக்கூடாது என்றும், வீட்டை விட்டு வெளியேறக்கூடாது என்றும் கூறி அவரை டிஜிட்டல் முறையில் அரெஸ்ட் செய்து மனரீதியாகப் பயமுறுத்தியுள்ளனர். இந்த வழக்கிலிருந்து விடுபட வேண்டுமானால், பிணைத் தொகையாகப் பணம் செலுத்த வேண்டும் என்று மோசடி கும்பல் வலியுறுத்தியுள்ளது. பயந்துபோன அந்த முதியவர், தனது வங்கிச் சேமிப்பு மற்றும் ஓய்வூதியத் தொகை உள்ளிட்ட ஒட்டுமொத்தப் பணமான ₹98 லட்சத்தை அவர்கள் குறிப்பிட்ட வெவ்வேறு வங்கிக் கணக்குகளுக்குப் பரிமாற்றம் செய்துள்ளார். சில நாட்களுக்குப் பிறகு தான் ஏமாற்றப்பட்டதை உணர்ந்த அவர், காவல்துறை மற்றும் சைபர் கிரைம் பிரிவில் புகார் அளித்துள்ளார்.
எச்சரிக்கை
பொதுமக்களுக்குக் காவல்துறையின் எச்சரிக்கை
சமீபகாலமாக இந்தியா முழுவதும் இந்த டிஜிட்டல் அரெஸ்ட் மோசடிகள் அதிகரித்து வருகின்றன. இது குறித்துக் காவல்துறை வெளியிட்டுள்ள எச்சரிக்கையில், எந்தவொரு அரசு நிறுவனமோ அல்லது காவல்துறையோ வீடியோ அழைப்பு மூலம் யாரையும் கைது செய்யாது எனத் தெரிவித்துள்ளது. சட்டப்பூர்வமான விசாரணைகளுக்கு நேரடி ஆஜராகுதல் மட்டுமே முறைப்படியானது. தெரியாத எண்களில் இருந்து வரும் மிரட்டல் அழைப்புகளை நம்பிப் பணத்தைப் பரிமாற வேண்டாம். இது போன்ற அழைப்புகள் வந்தால் உடனடியாக 1930 என்ற சைபர் உதவி எண்ணைத் தொடர்பு கொள்ளுமாறு அறிவுறுத்தப்பட்டுள்ளது.