ஈரோடு கிழக்கு தொகுதி இடைத்தேர்தலுக்கான வேட்பு மனு தாக்கல் நாளை துவக்கம்
ஈரோடு கிழக்கு தொகுதி காங்கிரஸ் எம்.எல்.ஏ.வாக இருந்த திருமகன் ஈ.வெ.ரா. கடந்த 4ம் தேதி மாரடைப்பு ஏற்பட்டு உயிரிழந்தார். இதனால் தேர்தல் ஆணையம் அத்தொகுதிக்கான இடைத்தேர்தலை பிப்ரவரி 27ம் தேதி நடத்தப்போவதாக கடந்த ஜனவரி 18ம் தேதி அறிவித்தது. இதற்கான வேட்புமனு தாக்கல் நாளை (ஜன.31.,) துவங்கவுள்ளது என்று தற்போது அறிவிக்கப்பட்டுள்ளது. இதற்கான கடைசி நாள் பிப்ரவரி 7ம் தேதி என்றும், மனுக்கள் மீதான பரிசீலனை பிப்ரவரி 8ம் தேதி என்றும் கூறப்பட்டுள்ளது. மனுக்களை திரும்பப்பெற பிப்ரவரி 10ம் தேதியே கடைசி என்றும் அறிவிக்கப்பட்டுள்ளது. இதனை தொடர்ந்து, ஈரோடு மாநகராட்சி மைய அலுவலகத்தின் கீழ் தளத்தில், தேர்தல் பிரிவு அலுவலகத்தில் வேட்புமனுக்கள் பெறுவதற்கான ஏற்பாடுகள் செய்யப்பட்டுள்ளது.
வேட்புமனு தாக்கல் செய்வதற்கான கட்டுப்பாடுகள் அறிவிப்பு
மேலும் வேட்புமனுக்களை காலை 11மணி முதல் 3மணி வரை தாக்கல் செய்யலாம். வேட்புமனு தாக்கல் செய்ய வரும் வேட்பாளருடன் 4பேர் மட்டுமே வருவதற்கு அனுமதி என்றும், வேட்பாளருடன் மூன்று கார்கள் மட்டுமே வரவேண்டும் என்றும் தேர்தல் பிரிவு அதிகாரிகள் தெரிவித்துள்ளார்கள். மனுதாக்கல் செய்யும் பொது வேட்பாளர்கள் டெபாசிட் தொகையாக ரூ.10ஆயிரமும், எஸ்.சி., எஸ்.டி., பிரிவினர் ரூ.5ஆயிரமும் செலுத்த வேண்டும் என்பது குறிப்பிடவேண்டியவை. இந்த இடைத்தேர்தலில் திமுக கூட்டணிகட்சி சார்பில் இறந்த திருமகன் ஈ.வெ.ரா.,வின் தந்தையும், காங்கிரஸ் முன்னாள் தலைவருமான ஈ.வி.கே.எஸ்.,இளங்கோவன் போட்டியிடுகிறார். இவர் தனது வேட்புமனு தாக்கலை பிப்ரவரி 3ம்தேதி தாக்கல் செய்யப்போவதாக முன்னரே அறிவிக்கப்பட்டுள்ளது. எதிர்க்கட்சியான அதிமுக சார்பில் ஈ.பி.எஸ். மற்றும் ஓபிஎஸ் சார்பில் தனித்தனியே தேர்தல் பணிக்குழுக்கள் அறிவிக்கப்பட்டுள்ளது குறிப்பிடத்தக்கது.
