பெண்கள், குழந்தைகளின் பாதுகாப்பை உறுதி செய்வது தலையாய கடமை - மு.க.ஸ்டாலின் அறிவுரை
செய்தி முன்னோட்டம்
சென்னை தலைமை செயலகத்தில் உள்ள நாமக்கல் கவிஞர் மாளிகையின் கூட்டரங்கில் தமிழக முதல்வர் மு.க.ஸ்டாலின், தமிழக காவல்துறை உயரதிகாரிகளுடன் விரிவான ஆலோசனையினை நடத்தினார்.
தமிழகத்தில் நிலவும் சட்ட-ஒழுங்கு பிரச்சனைகள் குறித்து பேசவே இந்த ஆலோசனை கூட்டம் நடத்தப்பட்டது.
இதில் டி.ஜி.பி.சங்கர் ஜிவால், தலைமை செயலாளர் சிவ்தாஸ் மீனா, உள்துறை செயலாளர் அமுதா உள்ளிட்ட உயரதிகாரிகள் பங்கேற்றனர்.
அதனையடுத்து இக்கூட்டத்தில் பேசிய மு.க.ஸ்டாலின், "சட்ட ஒழுங்கு காரணமாகவே தமிழ்நாடு அமைதி பூங்காவாக உள்ளது. அடுத்த ஓராண்டு மிக முக்கியமான காலமாகும், பிரச்சனைகளை பெரிதாக விடாமல் முளையிலேயே கிள்ளி எறிந்துவிடுங்கள்" என்றும்,
"நாடாளுமன்ற தேர்தல் நெருங்கும் நிலையில், மிக கவனமாக செயல்படவேண்டும், பெண்கள் மற்றும் குழந்தைகள் பாதுகாப்பினை உறுதிச்செய்வது நமது தலையாய கடமை" என்றும் கூறியுள்ளார்.
அறிவுரை
குற்றங்களை தடுக்கும் துறையாக காவல்துறை மாற வேண்டும் - மு.க.ஸ்டாலின்
தொடர்ந்து பேசிய முதல்வர், பொது மக்கள் கொடுக்கும் புகார்கள் மீது உடனே நடவடிக்கை எடுத்து, தண்டனை பெறச்செய்வதை உறுதிப்படுத்த வேண்டும்.
புகார்கள் மீது என்றும் அதிகாரிகள் நடுநிலை தவறாமல், தக்க நடவடிக்கைகளை மேற்கொள்ள வேண்டும் என்றும் அறிவுறுத்தியுள்ளார்.
மேலும், தமிழகத்தில் கள்ளச்சாராயம் குறைந்து காணப்பட்டாலும், அதனை முற்றிலும் அகற்றுவதனை உறுதி செய்ய வேண்டும் என்றும், போதைமருந்து பழக்கம் என்பது தனிநபர் பிரச்சனையில்லை, அது சமூகப்பிரச்சனை. எனவே, அதன்மீதும் தனிக்கவனம் செலுத்துவது அவசியம் என்று கூறியுள்ளார்.
சமூக வலைத்தளங்கள் மூலம் சாதி பிரச்சனைகளை ஏற்படுத்துவோரை கண்டறிந்து அவர்கள்மீது கடும் நடவடிக்கை எடுக்கப்பட வேண்டும். குற்றங்களை கண்டறியும் துறையாக மட்டுமில்லாமல், குற்றங்களை தடுக்கும் துறையாக காவல்துறை மாற வேண்டும் என்றும் அவர் கூறியுள்ளார் என்பது குறிப்பிடத்தக்கது.