ஈரோடு கிழக்கு இடைத்தேர்தல் - காங்கிரஸ் சார்பில் ஈ.வி.கே.எஸ். இளங்கோவன் போட்டி
ஈரோடு கிழக்கு தொகுதி எம்.எல்.ஏ. திருமகன் ஈவெரா மரணம் அடைந்ததையடுத்து, அப்பகுதியில் இடைத்தேர்தல் வரும் பிப்ரவரி 27ம் தேதி நடைபெறவுள்ளது. இதில் போட்டியிட அனைத்து கட்சிகளிலும் வேட்பாளர்கள் அறிவிக்கப்பட்டு, தேர்தல் பணிகளை மேற்கொண்டு வருகிறார்கள். அந்த வகையில் ஆளுங்கட்சியான திமுக தனது கூட்டணி கட்சியான காங்கிரஸ் கட்சியினரே இதில் போட்டியிடுவார்கள் என்று ஏற்கனவே அறிக்கை வெளியிட்டிருந்தது. இதனையடுத்து வேட்பாளர் தேர்வு குறித்த ஆலோசனை கூட்டம் சென்னை சத்தியமூர்த்தி பவனில் தமிழக காங்கிரஸ் மேலிட பொறுப்பாளர் தினேஷ் குண்டுராவ் தலைமையில் நடைபெற்றது. இதில் மாநில தலைவர் கே.எஸ்.அழகிரி, மூத்த தலைவர்கள் ஈ.வி.கே.எஸ். இளங்கோவன், திருநாவுக்கரசர், கிருஷ்ணசாமி உள்ளிட்டோர் கலந்துகொண்டனர்.
இடைத்தேர்தலில் போட்டியிடும் வேட்பாளர் குறித்து அதிகாரபூர்வ அறிவிப்பு
இந்நிலையில் நேற்று இரவு ஈரோடு இடைத்தேர்தலில் போட்டியிடும் வேட்பாளர் பட்டியலை அகில இந்திய காங்கிரஸ் தலைமை அதிகாரபூர்வமாக அறிவித்தது. அதன்படி, இந்த இடைத்தேர்தலில் முன்னாள் காங்கிரஸ் தலைவர் ஈ.வி.கே.எஸ். இளங்கோவன் போட்டியிட கட்சி மேலிடம் வாய்ப்பு அளித்துள்ளது. இதனை மாநில காங்கிரஸ் தலைவர் கே.எஸ்.அழகிரி தெரிவித்துள்ளார். இது குறித்து ஈ.வி.கே.எஸ். இளங்கோவன் கூறுகையில், காங்கிரஸ் தலைமை தன் மீது நம்பிக்கை வைத்து தன்னை வேட்பாளராக அறிவித்துள்ளது என்றும் தலைமையின் முடிவை ஏற்பதாகவும் கூறியுள்ளார். மேலும், தேர்தலில் காங்கிரஸ் அமோக வெற்றி பெறும் என்றும் தெரிவித்தார். முன்னதாக, தான் இந்த தேர்தலில் போட்டியிட போவதில்லை என்றும், தன் இளைய மகன் சஞ்சைக்கு தேர்தலில் போட்டியிட வாய்ப்பு கேட்டுள்ளதாகவும் ஈ.வி.கே.எஸ். இளங்கோவன் கூறியது குறிப்பிடத்தக்கது.
