விஜயகாந்துக்கு 'டிரக்கியாஸ்டமி' சிகிச்சையளிக்க மருத்துவர்கள் முடிவு
செய்தி முன்னோட்டம்
தேமுதிக கட்சி தலைவரும், சினிமா நடிகருமான விஜயகாந்த் கடந்த சில ஆண்டுகளாகவே உடல்நிலை பாதிக்கப்பட்டு, தனது பொது வாழ்க்கையில் இருந்து சற்று ஒதுங்கி வீட்டிலேயே ஓய்வு எடுத்து வருகிறார்.
இந்நிலையில், கடந்த 18ம்.,தேதி சென்னை நந்தம்பாக்கத்திலுள்ள மியாட் மருத்துவமனையில், தொடர் இருமல், மார்புசளி, காய்ச்சல், உடல் சோர்வு உள்ளிட்ட பாதிப்புகள் காரணமாக அனுமதிக்கப்பட்டார்.
அங்கு அவருக்கு மருத்துவர்கள் தொடர் சிகிச்சையளித்து வருகிறார்கள் என்று தகவல்கள் வெளியான நிலையில், அவரது உடல்நிலையில் முன்னேற்றம் உள்ளது விரைவில் அவர் வீடு திரும்புவார் என்று மருத்துவமனை அறிக்கையும் வெளியானது.
ஆனால் இன்று(நவ.,29) மியாட் மருத்துவமனை நிர்வாகம் இதற்கு எதிர்மறையான அறிக்கை ஒன்றினை வெளியிட்டு அனைவரையும் அதிர்ச்சியில் ஆழ்த்தியது.
மருத்துவமனை
டிரக்கியாஸ்டமி சிகிச்சையளிப்பது குறித்து மருத்துவர்கள் ஆலோசனை
அதன்படி அந்த அறிக்கையில், 'விஜயகாந்த் உடல்நிலை சீராக இல்லை. அவருக்கு நுரையீரல் சிகிச்சைக்கான உதவி தேவைப்படுகிறது' என்றும்,
'அவருக்கு இன்னும் 14 நாட்களுக்கு மருத்துவமனையின் தொடர் சிகிச்சை தேவைப்படுகிறது' என்றும் கூறப்பட்டிருந்தது.
இந்த தகவலானது அவரது ரசிகர்கள் மற்றும் ஆதரவாளர்கள் மத்தியில் பெரும் சோகத்தினை ஏற்படுத்தியது.
இந்நிலையில் தற்போது வெளிவந்துள்ள தகவல்படி, விஜயகாந்துக்கு தற்போதுள்ள ஸ்வாசக்கோளாறுக்கு நிவாரணம் அளிக்க வேண்டுமெனில் அவருக்கு 'டிரக்கியாஸ்டமி' சிகிச்சையளிக்க வேண்டும் என்று மருத்துவர்கள் ஆலோசனை செய்து வருகிறார்களாம்.
டிரக்கியாஸ்டமி என்றால், கழுத்தின் வெளிப்புறத்தில் மூச்சு குழாயில் ஒரு சிறு துளையிட்டு திறப்பை உருவாக்கி ஸ்வாசத்தை சீராக்கும் நடைமுறையாகும் என்றும், அந்த துளை மூலம் ஒரு குழாய் செருகப்பட்டு அதன் மூலம் ஸ்வாசிக்க முடியும் என்றும் கூறப்படுகிறது.