சென்னை சர்வதேச புத்தக கண்காட்சியில் முதல்வர் - மொழிபெயர்க்கப்பட்ட நூல்களை வெளியிட்டார்
செய்தி முன்னோட்டம்
தமிழகத்தில் முதன்முறையாக சென்னை நந்தனம் ஒய்.எம்.சி.ஏ. மைதானத்தில் கடந்த 16ம் தேதி சர்வதேச புத்தக கண்காட்சி துவங்கப்பட்டது.
இதில் 30க்கும் மேற்பட்ட நாடுகளை சேர்ந்த பதிப்பாளர்கள் பங்கேற்றனர், கண்காட்சிக்காக 66 அரங்குகள் பிரத்யேகமாக உருவாக்கப்பட்டிருந்தன.
நேற்று நிறைவு பெற்ற இந்த புத்தக கண்காட்சியில் தமிழக முதல்வர் மு.க.ஸ்டாலின் கலந்துகொண்டார்.
அப்போது மருத்துவ மாணவர்களுக்காக தமிழில் மொழிபெயர்க்கப்பட்ட பன்னாட்டு பதிப்பு நூல்களை அவர் வெளியிட்டார்.
இதனை தொடர்ந்து பேசிய அவர், தொழில் வளர்ச்சி மற்றும் செஸ் ஒலிம்பியாட் போட்டிகள் மூலம் உலகளவில் தமிழ்நாடு முத்திரை பதித்துள்ளது என்று பெருமிதம் கொண்டார்.
இந்த நிகழ்ச்சியில் அமைச்சர்கள் அன்பில் மகேஷ் பொய்யா மொழி, உதயநிதி ஸ்டாலின், சேகர் பாபு, மா.சுப்ரமணியம் உள்ளிட்டோர் கலந்துகொண்டனர்.
ரூ.3 கோடி
365 நூல்கள் மொழிபெயர்ப்பு செய்வதற்கான புரிந்துணர்வு ஒப்பந்தங்கள் கையெழுத்து
தொடர்ந்து பேசிய அவர், இலக்கிய செழுமைமிக்க நமது படைப்புகளை உலகம் முழுவதும் கொண்டு சேர்க்க வேண்டும்.
உலகளவில் உள்ள சிறந்த அறிஞர்கள் படைப்புகளை தமிழில் கொண்டு வரும் பணியில் தமிழ்நாடு அரசு திட்டமிட்டு செயல்பட்டு வருகிறது என்று கூறினார்.
மேற்கொள்ளப்பட்டுள்ள இந்த திட்டத்திற்காக ரூ.3 கோடி வழங்கப்படும் என்றும் தமிழக முதல்வர் அறிவித்துள்ளார்.
முன்னதாக, தமிழ் மொழியில் இருந்து மற்ற இந்திய மொழிகளுக்கும், 90 நூல்கள் உலக மொழிகளுக்கும் மொழிபெயர்ப்பு செய்யப்பட்டது குறிப்பிடவேண்டியவை.
இந்நிலையில், மீண்டும் 365 நூல்களை மொழிபெயர்ப்பு செய்வதற்கான புரிந்துணர்வு ஒப்பந்தங்களும் கண்காட்சியில் கையெழுத்தானது என்று செய்திகள் தெரிவிக்கிறது.