இந்தியாவின் வீல் சேர் கிரிக்கெட் அணி கேப்டன் என்று கூறி மோசடி - மாற்றுத்திறனாளி மீது வழக்குப்பதிவு
செய்தி முன்னோட்டம்
ராமநாதபுரம் மாவட்டம் கீழச்சல்லனூர் கிராமத்தினை சேர்ந்தவர் வினோத் பாபு.
மாற்றுத்திறனாளியான இவர் உள்ளூர் மற்றும் தமிழ்நாடு மட்டுமல்லாமல் இந்தியாவின் பல மாநிலங்களில் மாற்றுத்திறனாளி கிரிக்கெட் போட்டிகளில் பங்குபெற்றுள்ளார் என்று செய்திகள் வெளியானது.
சமீபத்தில் இவர் தமிழக முதல்வர் மு.க.ஸ்டாலின் அவர்களை சந்தித்து அரசு வேலை வேண்டும் என்றும் கோரியிருந்தார்.
விளையாட்டுத்துறை அமைச்சர் உதயநிதி ஸ்டாலின் உட்பட பலரை ஏமாற்றிய வினோத் பாபுவின் புகைப்படம் அண்மையில் இணையத்தில் வைரலானது.
இதனை கண்ட உண்மையான மாற்றுத்திறனாளி விளையாட்டு வீரர்கள் உளவுத்துறையிடம் புகார் அளித்துள்ளார்கள்.
அந்த புகாரின் அடிப்படையில் உளவுத்துறை அதிகாரிகள் இவர் குறித்து விசாரணை நடத்தினர்.
அதில் இவர் போலி விளையாட்டு வீரர் என்றும், இவரிடம் பாஸ்போர்ட் கூட இல்லை என்பதும் தெரியவந்துள்ளது.
கிரிக்கெட்
வினோத் பாபு மீது மாவட்ட குற்றப்பிரிவு போலீசார் வழக்குப்பதிவு
இதனை தொடர்ந்து அவர் கடையில் வாங்கிய வெற்றி கோப்பைகளை கொண்டு, தான் ஆசியக்கோப்பை வீல்சேர் கிரிக்கெட் போட்டியில் பங்கேற்று பாகிஸ்தானை வீழ்த்தி கோப்பையினை வென்றதாக கூறி அமைச்சர்கள் உள்பட பலரை ஏமாற்றி அவர்கள் நேரில் சந்தித்து வாழ்த்துக்களை பெற்றுள்ளார் என கூறப்படுகிறது.
இது போன்ற விஷயங்கள் விசாரணையில் தெரியவந்த நிலையில் அவர் போலியான நபர் என்பதனை உளவுத்துறை உறுதி செய்துள்ளது.
இதனையடுத்து உண்மையான வீல் சேர் கிரிக்கெட் வீரர்கள் மாவட்ட ஆட்சியர் மற்றும் மாவட்ட காவல் கண்காணிப்பாளர் அலுவலகத்தில் புகார் அளித்துள்ளார்கள்.
அந்த புகாரின் அடிப்படையில் தற்போது வினோத் பாபு மீது மாவட்ட குற்றப்பிரிவு போலீசார் இன்று(ஏப்ரல்.,27) 406 மற்றும் 420 ஆகிய பிரிவுகளின் கீழ் வழக்குப்பதிவு செய்துள்ளார்கள் என்பது குறிப்பிடத்தக்கது.