செல்போன் சார்ஜர் வயரால் பறிபோன 8 மாத குழந்தையின் உயிர்
செய்தி முன்னோட்டம்
கர்நாடகா மாநிலம் உத்திரகன்னடா மாவட்டத்தில் கார்வார் என்னும் பகுதியினை சேர்ந்த தம்பதி சந்தோஷ் கல்குட்கர்-சஞ்சனா.
இந்த தம்பதிக்கு கடந்த 8 மாதங்களுக்கு முன்னர் பெண் குழந்தை பிறந்த நிலையில், அதற்கு சானித்யா என பெயர் சூட்டியுள்ளனர்.
இந்நிலையில் நேற்று(ஆகஸ்ட்.,2) இந்த தம்பதி தங்கள் இல்லத்தில் செல்போனை சார்ஜரில் போட்டுள்ளனர்.
செல்போனில் சார்ஜ் ஏறியதும், போனை எடுத்த தம்பதி, சார்ஜரின் இணைப்பினை அணைக்காமல் அப்படியே விட்டுவிட்டதாக கூறப்படுகிறது.
இதனையடுத்து அந்த சார்ஜர் வயரினை பிடித்து குழந்தை சானித்யா விளையாடி கொண்டிருந்துள்ளார்.
பின்னர் அந்த வயரினை குழந்தை வாயில் வைத்து விளையாடிய நிலையில், சற்றும் எதிர்பாரா விதமாக மின்சாரம் தாக்கி பரிதாபமாக உயிரிழந்துள்ளார்.
உயிரிழப்பு
மின் இணைப்பை துண்டிக்க வேண்டும் - காவல்துறை அறிவுறுத்தல்
இது குறித்து தகவல் அறிந்த கார்வார் புறநகர் காவல்துறை விரைந்து சம்பவ இடத்திற்கு வந்து விசாரணை மேற்கொண்டுள்ளது.
அதில் ப்ளக் பாய்ண்டில் போடப்பட்டிருந்த சார்ஜரின் மின் இணைப்பு அணைக்காமல் விட்டதால் தான் குழந்தையின் உயிர் பறிபோயுள்ளது என்பது தெரியவந்தது.
இதனையடுத்து குழந்தை சானித்யாவின் பிரேத பரிசோதனைக்காக அரசு மருத்துவமனைக்கு காவல்துறை அனுப்பி வைத்துள்ளது.
பெற்றோரின் கவனக்குறைவால் நிகழ்ந்துள்ள இந்த சம்பவம் குறித்து காவல்துறை பேசுகையில், செல்போன் சார்ஜ் ஆனதும் உடனே சார்ஜரின் மின் இணைப்பை துண்டிக்க வேண்டும்.
இல்லையேல் சார்ஜரை கழற்றி வேறு இடத்தில் வைக்க வேண்டும் என்று அறிவுறுத்தியுள்ளனர் என்பது குறிப்பிடத்தக்கது.