ஓசூர் வனக்கோட்டத்தில் 218 பறவை இனங்கள் இருப்பது கண்டுபிடிப்பு
செய்தி முன்னோட்டம்
கிருஷ்ணகிரி மாவட்டம் ஓசூரின் வனக்கோட்டத்தில் 218 பறவை இனங்கள் இருப்பது கண்டுபிடிக்கப்பட்டுள்ளதாக வன உயிரின காப்பாளர் ஒருவர் தெரிவித்துள்ளார்.
இது குறித்து பேசிய வன உயிரின காப்பாளர் கார்த்திகேயனி, "ஓசூரில் இருக்கும் வனக்கோட்டத்தின் மொத்த பரப்பளவு 1501 சதுர கிலோ மீட்டர் ஆகும். இதில் காவேரி வடக்கு சரணாலயத்தின் பரப்பளவு 504.33 சதுர கிலோ மீட்டர் மற்றும் காவேரி தெற்கு சரணாலயத்தின் பரப்பளவு 686.40 சதுர கிலோ மீட்டர் ஆகும். இந்த சரணாலயங்களில் 36 வகையான பாலூட்டி இனங்களும், 468 வகையான தாவரங்களும், 172 வகையான வண்ணத்து பூச்சி இனங்களும், 272 வகையான பறவைகளும் இருக்கிறது." என்று கூறியுள்ளார்
தமிழகம்
218 பறவை இனங்கள் இருப்பது பதிவு செய்யப்பட்டது
இது குறித்து மேலும் பேசிய அவர், "இந்த ஆண்டில் தமிழகம் முழுவதும் வனத்துறையின் மூலம் இரண்டு கட்டமாக பறவைகள் கணக்கெடுப்பு நடத்த திட்டமிடப்பட்டது. முதற்கட்ட கணக்கெடுப்பு காப்புக் காடுகளுக்கு வெளியே உள்ள ஈர நிலப் பகுதிகளில் எடுக்கப்பட்டது. இரண்டாம் கட்ட கணக்கெடுப்பு காப்புக்காடு பகுதிகளில் நடத்தப்பட்டது. இதில் 60க்கும் மேற்பட்ட தன்னார்வலர்கள் பங்கேற்றனர். இந்த கணக்கெடுப்பின் போது, பெரிய பச்சைப் புறா, ஊதா தேன்சிட்டு, நீலத் தொண்டை ஈப்பிடிப்பான், கருந்தலை மாம்பழக் குருவி, செந்தலை பஞ்சுருட்டான், கள்ளிப் புறா, மீன் கொத்தி, கொண்டலாத்தி குருவி, அரசவால் ஈப்பிடிப்பான், காட்டுப் பக்கி குருவி, சிறிய மீன்பிடி கழுகு உள்ளிட்ட 218 பறவை இனங்கள் இருப்பது கண்டுபிக்கப்பட்டது" என்று கூறினார்.