தெலுங்கு நடிகருக்கு வில்லனாகும் மக்கள் செல்வன் விஜய் சேதுபதி
தெலுங்கு நடிகர் ராம் சரண் தற்போது தனது 16வது திரைப்படத்தினை நடிக்கவுள்ள நிலையில், அது தொடர்பான விவரங்கள் அண்மையில் வெளியானது. அதன்படி, இப்படத்தினை 2021ம் ஆண்டு தெலுங்கு திரையுலகில் வெளியாகி புகழ்பெற்ற 'உப்பன்னா' என்னும் படத்தின் இயக்குனர் புஜ்ஜி பாபு சனா தான் இப்படத்தினை இயக்கவுள்ளார் என்ற அதிகாரப்பூர்வ அறிவிப்பு தெரிவிக்கப்பட்டது. இப்படத்தின் வில்லன் கதாபாத்திரத்தில் நடிப்பது குறித்த நடிகர் தேர்வு நடத்தப்பட்ட நிலையில், இப்படக்குழு 'மக்கள் செல்வன்' விஜய் சேதுபதி அவர்களை அணுகியதாக கூறப்படுகிறது. இது குறித்த பேச்சுவார்த்தை நடத்தப்பட்டு வந்ததையடுத்து, விஜய் சேதுபதி தற்போது இப்படத்தில் நடிக்க ஒத்துக்கொண்டுள்ளார் என்றும் கூறப்படுகிறது.
ரசிகர்கள் மத்தியில் எதிர்பார்ப்பினை அதிகரித்த ஆர்.சி.16 திரைப்படம்
இதனை தொடர்ந்து தெலுங்கு திரையுலகில் நீண்ட கால இடைவெளிக்கு பின்னர் இசைப்புயல் ஏ.ஆர்.ரகுமான் இப்படத்திற்கு இசையமைக்கவுள்ளார் என்று தெரிகிறது. 1992ம் ஆண்டு 'ரோஜா' திரைப்படம் மூலம் இசையமைப்பாளராக அறிமுகமான ஏஆர் ரஹ்மான் இதுவரை 5 தெலுங்கு திரைப்படங்களுக்கு மட்டுமே இசையமைத்துள்ளாராம். அதன்படி, அவர் இசையமைக்கவுள்ள 6வது தெலுங்கு திரைப்படம் ஆர்.சி.-16 என்று கூறப்படுகிறது. விளையாட்டினை கதைக்களமாக கொண்டு இப்படம் எடுக்கப்படவுள்ளது. சமீப காலங்களில் விஜய் சேதுபதி வில்லனாக நடிக்கும் படங்கள் வெற்றியடைந்து வரும் நிலையில், தற்போது இப்படத்தின் மீதான எதிர்பார்ப்பும் ரசிகர்கள் மத்தியில் அதிகரித்துள்ளது குறிப்பிடத்தக்கது.
