மறைந்த நடிகர் மனோபாலா கடைசியாக நடித்த படம்: வைரலாகும் புகைப்படங்கள்
கோலிவுட்டின் பிரபல இயக்குனரும், நடிகருமான மனோபாலா, நேற்று (மே 3.,) அன்று மதியம் உயிரிழந்தார். அவரின் திடீர் மரண செய்தி திரைபிரபலங்கள் மட்டுமின்றி, பொதுமக்களையும் அதிர்ச்சியில் ஆழ்த்தியது. அவரின் உடலுக்கு பலரும் நேரில் வந்து அஞ்சலி செலுத்தினர். அவரின் இறுதி ஊர்வலம் இன்று (மே 4 .,) காலை நடைபெற்றது. அவரின் மறைவிற்கு பலரும் இரங்கல் தெரிவித்துவரும் வேளையில், அவர் இறுதியாக நடித்த திரைப்படத்தின் படப்பிடிப்பு தளத்தில் எடுக்கப்பட்ட புகைப்படங்கள் தற்போது வைரலாகி வருகிறது. இயக்குனர் கதிர்வேல் இயக்கத்தில், யோகி பாபு ஹீரோவாக நடிக்கும் பெயர் சூட்டப்படாத ஒரு படத்தில் தான் மனோபாலா, கடைசியாக நடித்து வந்தார்.
படப்பிடிப்பு தளத்தில் பிறந்தநாளை கொண்டாடிய மனோபாலா
மனோபாலாவின் பிறந்தநாளும் அந்த படப்பிடிப்பு தளத்தில் கொண்டாடப்பட்டது என்பது குறிப்பிடத்தக்கது. இந்நிலையில், அந்த புகைப்படங்களை பகிர்ந்து, இயக்குனர் கதிர்வேல் ஒரு ட்வீட் இட்டுள்ளார். அந்த ட்விட்டர் பதிவில் அவர், "கடைசியாக படப்பிடிப்பு தளம் வந்து படுத்தபடியே"என்னால முடியலடா! மருத்துவமனைக்கு போய் வருகிறேன் என சொல்லி விட்டு போனவரே இப்படி சொல்லாமல் போவது முறையா?கடைசி பிறந்த நாளை எம்மோடு கொண்டாடி விட்டு இப்படி நடுவழியில் திண்டாட விட்டுவிட்டு போதல் சரியா?" என வருத்தத்துடன் குறிப்பிட்டுள்ளார். பாரதிராஜாவின் அசிஸ்டண்டாக தனது திரை பயணத்தை துவங்கியவர் மனோபாலா. பல படங்களில், பல இயக்குனர்களிடம் உதவி இயக்குனராக பணிபுரிந்த இவர், 'ஆகாய கங்கை' என்ற படத்தின் மூலம் இயக்குநரானார். நடிகர் சங்கத்திலும் முனைப்போடு செயல்பட்டவர்.
