'ஜெயிலர்' திரைப்பட இயக்குநர் நெல்சனின் பிறந்த தினம் இன்று
கோலமாவு கோகிலா, டாக்டர், பீஸ்ட் ஆகியப் படங்களை இயக்கிய இயக்குநர் நெல்சன் இன்று(ஜூன் 21) தனது 39வது பிறந்தநாளை கொண்டாடுகிறார். தற்போது, ரஜினி மற்றும் தமன்னா நடிக்கும் 'ஜெயிலர்' திரைப்படத்தை இயக்கி வரும் நெல்சன், தனது கோலமாவு கோகிலா திரைப்படத்தின் மூலம் தமிழ் திரை உலகத்தையே திரும்பி பார்க்க வைத்தார். காமெடி நடிகரான யோகி பாபு ஹீரோவாக நடித்திருந்த இப்படத்தில், நடிகை நயன்தாரா கதாநாயகியாக நடித்திருந்தார். ஒரு வித்தியாசமான கதைக்களத்தில் படமாக்கப்பட்ட இந்த திரைப்படம், ரசிகர்கள் மத்தியில் நீங்காத இடம் பிடித்திருக்கிறது. இந்த படத்தின் வெற்றிக்கு பிறகு, நடிகர் சிவகார்த்திகேயனை வைத்து 'டாக்டர்' என்ற திரைப்படத்தை நெல்சன் இயக்கினார்.
நடிகர் விஜயின் படத்தை இயக்கும் வாய்ப்பு நெல்சனுக்கு கிடைத்தது
'டாக்டர்' திரைப்படம் 2021ஆம் ஆண்டின் மிக பெரும் காமெடி திரைப்படமாக உருவெடுத்தது. சிவகார்த்திகேயனின் ரசிகர்கள் மட்டுமல்லாமல், பொது மக்களும் குடும்பத்துடன் இந்த படத்தை பார்த்து ரசித்தனர். இதனால், இந்த படமும் பெரும் வெற்றி அடைந்ததது, இயக்குநர் நெல்சனுக்கும் பெரும் புகழ் வந்து சேர்ந்தது. அதன் பிறகு, நடிகர் விஜயின் படத்தை இயக்கும் மாபெரும் வாய்ப்பு நெல்சனுக்கு கிடைத்தது. நெல்சன் இயக்கத்தில் நடிகர் விஜய் நடித்த 'பீஸ்ட்' திரைப்படம் ஏப்ரல் 2022 வெளியானது. இந்த திரைப்படத்திற்கு நிறைய எதிர்மறையான விமர்சனங்கள் வந்திருந்தாலும், இது வணிக ரீதியாக வெற்றி அடைந்தது என்றே கூறப்படுகிறது. இந்நிலையில், இவர் தற்போது நடிகர் ரஜினியை வைத்து 'ஜெயிலர்' என்ற திரைப்படத்தை இயக்கி வருகிறார்.
