டோரதி படத்தின் ஒரிஜினல் கிளைமாக்ஸ்: சுவாரசிய தகவல் சொன்ன இயக்குநர் கார்த்திக் சுப்புராஜ்
செய்தி முன்னோட்டம்
தமிழ் சினிமாவின் முன்னணி இயக்குநர்களில் ஒருவரான கார்த்திக் சுப்புராஜ் இயக்கத்தில், நடிகை கீர்த்தி சுரேஷ் முதன்மைக் கதாபாத்திரத்தில் நடித்து திரையரங்குகளில் வெற்றிகரமாக ஓடிக்கொண்டிருக்கும் 'டோரதி' திரைப்படத்தின் ஒரிஜினல் கிளைமாக்ஸ் குறித்த சுவாரசியத் தகவலை இயக்குநர் கார்த்திக் சுப்புராஜ் நேர்காணல் ஒன்றில் வெளிப்படையாகப் பகிர்ந்துள்ளார். 1990-களின் பின்னணியில் சாதிய வன்முறை மற்றும் இரு நண்பர்களின் வாழ்க்கையை மையமாகக் கொண்டு உருவான இத்திரைப்படம், கார்த்திக் சுப்புராஜின் 10-வது படைப்பாக வெளியாகி தியேட்டர்கள் மட்டுமின்றி ஓடிடி தளத்திலும் ரசிகர்களிடையே ஏகோபித்த வரவேற்பைப் பெற்று வருகிறது.
பாராட்டு மழை
திரையுலக பிரபலங்கள் பாராட்டு
இப்படத்தில் ரிஷிகாந்த், சனந்த் உள்ளிட்டோர் முக்கிய வேடங்களில் நடிக்க, இசைஞானி இளையராஜா இசையமைத்துள்ளார். திரு ஒளிப்பதிவு பணிகளைக் கவனித்துள்ளார்.
கடந்த 25-ஆம் தேதி திரைக்கு வந்த இப்படத்தில் கீர்த்தி சுரேஷின் யதார்த்தமான மற்றும் தீர்க்கமான நடிப்பு ரசிகர்களை வெகுவாகக் கவர்ந்துள்ளது.
நடிகர் தனுஷ், நடிகை ஸ்ரீலீலா, முன்னணி இயக்குநர்களான மணிரத்னம், ராஜு முருகன், தமிழரசன் பச்சமுத்து மற்றும் நடிகர் ஸ்ரீமன் உள்ளிட்ட பல்வேறு திரைப்பிரபலங்கள் டோரதி திரைப்படத்தைப் பார்த்துவிட்டு சமூக வலைதளங்களில் தங்களது மனமார்ந்த பாராட்டுகளைப் பதிவு செய்துள்ளனர்.
கிளைமாக்ஸ்
கார்த்திக் சுப்புராஜ் பகிர்ந்த ஒரிஜினல் கிளைமாக்ஸ்
இந்நிலையில், சமீபத்திய பேட்டியில் படத்தின் அசல் கிளைமாக்ஸ் குறித்து மனம் திறந்த இயக்குநர் கார்த்திக் சுப்புராஜ், "டோரதி படத்தின் மூலக்கதையில் (Original Script), சுப்புவை பெண் உடையில் பார்த்தவுடன் வீரய்யாவுக்குத் தனது தாய் நினைவுக்கு வருகிறது.
அதனால் அவரது மனம் மாறி, கார்த்தியைத் தாக்க வரும் தனது ஆட்களைத் தடுக்க முயற்சிக்கிறார்.
ஆனால் அவரது ஆட்கள் கார்த்தியைக் கொல்ல முற்படும் தருணத்தில், களத்தில் ஆவேசமாக இறங்கும் டோரதி, உலகப் புகழ்பெற்ற புரூஸ் லீ பாணியில் அதிரடி சண்டையிட்டு எதிரிகளைப் பந்தாடுகிறார்.
இந்த மிரட்டலான ஆக்ஷன் காட்சியுடன்தான் உண்மையான கிளைமாக்ஸ் முடிவதாக நாங்கள் முதலில் திட்டமிட்டிருந்தோம்" என்று திரைக்கதை ரகசியத்தை உடைத்துள்ளார்.