பங்குச்சந்தையில் பெரும் வீழ்ச்சி: 1000 புள்ளிகளுக்கு மேல் சரிந்த சென்செக்ஸ்

எழுதியவர் Venkatalakshmi V

May 11, 2026

10:12 am

செய்தி முன்னோட்டம்

இந்தியப் பங்குச்சந்தை வாரத்தின் முதல் நாளான திங்கட்கிழமை அன்று பெரும் சரிவுடன் தொடங்கியுள்ளது. வர்த்தகம் தொடங்கிய சில நிமிடங்களிலேயே மும்பை பங்குச்சந்தை குறியீட்டு எண்ணான சென்செக்ஸ் (Sensex) 1,000 புள்ளிகளுக்கு மேல் சரிந்து முதலீட்டாளர்களை அதிர்ச்சியில் ஆழ்த்தியது. மத்திய கிழக்கு நாடுகளின் போர்ச் சூழல் மற்றும் கச்சா எண்ணெய் விலை உயர்வு ஆகியவற்றால் உருவான உலகளாவிய பொருளாதார நெருக்கடியே இந்த வீழ்ச்சிக்கு முக்கியக் காரணமாகப் பார்க்கப்படுகிறது.

காரணங்கள்

பங்குச்சந்தை வீழ்ச்சிக்கான முக்கிய காரணங்கள்

சர்வதேச சந்தையில் பிரெண்ட் கச்சா எண்ணெய் விலை ஒரு பேரலுக்கு 105 டாலரைத் தாண்டியது இந்திய சந்தையில் பெரும் தாக்கத்தை ஏற்படுத்தியுள்ளது. மேலும், அமெரிக்க அதிபர் டொனால்ட் டிரம்ப் ஈரானின் அமைதிப் பேச்சுவார்த்தைக்கான பதிலை நிராகரித்ததால், வளைகுடா பகுதியில் மீண்டும் பதற்றம் அதிகரித்துள்ளது. இது இந்தியாவின் அந்நியச் செலாவணி மற்றும் இறக்குமதிச் செலவை அதிகரிக்கும் என்ற அச்சம் முதலீட்டாளர்கள் மத்தியில் நிலவுகிறது.

சந்தை

பிரதமரின் வேண்டுகோளும் சந்தை எதிர்வினையும்

பெட்ரோல், டீசல், தங்கம் மற்றும் இறக்குமதி செய்யப்படும் சமையல் எண்ணெய் ஆகியவற்றின் பயன்பாட்டைக் குறைக்குமாறு பிரதமர் நரேந்திர மோடி விடுத்த கோரிக்கையும் சந்தையில் எதிர்மறையான விளைவுகளை ஏற்படுத்தியுள்ளது. இந்த 'சிக்கன நடவடிக்கை', 2026-27 நிதியாண்டில் நாட்டின் பொருளாதார வளர்ச்சியில் பாதிப்பை ஏற்படுத்தலாம் என ஆய்வாளர்கள் கருதுகின்றனர். குறிப்பாக விமானப் போக்குவரத்து, ஹோட்டல் மற்றும் நகை விற்பனை சார்ந்த நிறுவனங்களின் பங்குகள் கடுமையாகச் சரிந்துள்ளன.

பாதிப்பு

பாதிக்கப்பட்ட முக்கியப் பங்குகள்

தங்கம் வாங்குவதைத் தவிர்க்குமாறு பிரதமர் கூறியதால், டைட்டன் நிறுவனத்தின் பங்குகள் 5.6% வரை சரிந்தன. கச்சா எண்ணெய் விலை உயர்வால் இண்டிகோ மற்றும் எஸ்பிஐ பங்குகளும் தலா 3% முதல் 4% வரை வீழ்ச்சியடைந்தன. ரிலையன்ஸ், மாருதி சுசூகி மற்றும் பார்தி ஏர்டெல் போன்ற முன்னணி நிறுவனங்களின் பங்குகளும் சரிவைச் சந்தித்தன. அதேசமயம், மருந்துத் துறை மற்றும் நுகர்வோர் பொருட்கள் துறை (FMCG) சார்ந்த சில பங்குகள் மட்டும் ஓரளவுக்குத் தப்பித்துள்ளன. கச்சா எண்ணெய் விலை தொடர்ந்து 100 டாலருக்கு மேல் நீடித்தால், இந்தியப் பங்குச்சந்தையில் இந்தத் தள்ளாட்டம் இன்னும் சில நாட்களுக்குத் தொடர வாய்ப்புள்ளதாகப் பொருளாதார நிபுணர்கள் எச்சரிக்கின்றனர்.